Туркиянинг Baykar Makina компанияси Украинага учта Bayraktar ТB2 дронларини бепул беради. Бу ҳақда компаниянинг Twitter’даги баёнотида айтилган, дея хабар берди «РБК». Дронларни сотиб олиш учун мамлакат аҳолиси краудфандинг орқали пул йиғган эди.
«Бу мақсадга эришиш учун бир неча кун давомида ишбилармонлар ва оддий одамлар катта-кичик миқдорда маблағ ажратди. Baykar компанияси ТB2 учун тўлов олмайди ва учта дронни Украина фронтига бепул юборади», — дейилади хабарда
ТB2 сотиб олиш учун йиғилган пул Россия босқини бошланганидан кейин мамлакатни тарк этган украиналик қочқинларга ёрдам бериш учун сарфланади. БМТ маълумотларига кўра, 21 июнь ҳолатига кўра, 24 февралдан бери Украинани 8 миллиондан ортиқ киши тарк этган.
Украина турк дронларини 2019 йил бошидан сотиб олишни бошлаган. Bayraktar ТB2 лардан кечаси ҳам кундузи ҳам фойдаланиш мумкин, улар лазерли бошқарув тизимлари билан жиҳозланган. Битта қурилманинг жанговар юки 8 километргача учадиган тўртта ракетадан иборат (баъзи модификациялар учун — 16 километргача).
Май ойининг охирида Литванинг Laisves ТV телеканали Украинага Bayraktar сотиб олиш учун маблағ йиғишни бошлаган эди. Телеканал 5,9 миллион евро йиғишга муваффақ бўлди. Бироқ Baykar компанияси йиғилган пул Украинага инсонпарварлик ёрдами учун сарфланиши, Украина ва Литва байроқлари рангларига бўялган дрон эса совға қилиниши ҳақида жамоатчилик билан келишиб олди.
Изоҳ (0)