Тошкент шаҳрининг Олмазор туманида қўшни давлат институтига ўқишга киритиб бермоқчи бўлган шахс ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Олмазор туман бўлими томонидан тезкор тадбир ўтказилган. Тадбирда Ш.Ж. исмли шахс фуқаро Ж.дан танишлари орқали Тожикистондаги Педагогика институтига ўқишга киритиб, кейинчалик ўқишини Ўзбекистондаги олий таълим муассасасига 2-босқичдан кўчиртириб бериш эвазига 3,2 минг доллар олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қашқадарёда икки кишини ўқишга киритиб қўйиш учун 10 минг доллар пора олган шахс қўлга тушгани, Фарғонада Тошкент тиббиёт академиясига ўқишга киритиб қўйиш учун 10 минг доллар олган шахс ушлангани тўғрисида хабар берилганди.
Изоҳ (0)