Ўзбекистонда крипто-активлар майнингини рўйхатдан ўтказиш тартиби тўғрисидаги низом лойиҳаси эълон қилинди

Истиқболли лойиҳалар миллий агентлиги «Крипто-активлар майнингини рўйхатдан ўтказиш тартиби тўғрисидаги низомни тасдиқлаш тўғрисида»ги идоралараро буйруқ лойиҳасини муҳокамага қўйди.

Ҳужжат лойиҳасига кўра, майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади. Майнинг рўйхатга олувчи орган томонидан мажбурий рўйхатдан ўтказилади ва лицензияланадиган фаолият турига кирмайди.

Юридик шахс томонидан, майнингни амалга ошириш ҳуқуқи сертификат берилган вақтдан бошлаб вужудга келади. Сертификатнинг амал қилиш муддати бир йилни ташкил этади, майнерлар электрон реестрда рўйхатдан ўтишлари шарт.

Майнерлар, майнингни барқарорлигини таъминлаш мақсадида, истеъмол қилинган электр энергиясининг ҳисобини юритиш учун алоҳида ҳисоблагич ўрнатган ҳолда ягона электр энергетика тизимига, фақатгина:

• тиғиз давр — кечки максимум (соат 17:00 дан 22:00 гача) — Вазирлар Маҳкамаси томонидан белгиланадиган устамаларни инобатга олган ҳолда белгиланадиган тегишли тарифлар асосида;
• тунги давр — сутканинг қоронғи даври (соат 22:00 дан 00:00 гача ва соат 00:00 дан 06:00 гача) – белгиланган тарифга нисбатан икки баробар ўсувчи коэффициентни қўллаш асосида уланиш ҳуқуқига эга.

Ўзбекистон ҳудудида яширин майнингни амалга ошириш, аноним крипто-активлар майнинги, рўйхатга олинган пайтда кўрсатилган манзилга мос келмайдиган манзилда майнингни амалга ошириш, майнингни сертификатни олмаган ҳолда амалга ошириш тақиқланади.

Қуйидагилар майнингни амалга ошириш учун рухсат бериш талаблари ва шартлари ҳисобланади:

• электр энергиясини ишлаб чиқаришга тайёр бўлган, ўрнатилган ва ишга яроқли қуёш фотоэлектр станцияларининг тасарруфида мавжудлиги;
• майнинг ускуналарини ўрнатиш учун мўлжалланган алоҳида жойнинг мавжудлиги;
• Ўзбекистоннинг крипто-активлар айланмаси соҳасидаги қонунчилик талабларига риоя қилиш;
• фаолиятни фақат рўйхатга олинган пайтда кўрсатилган манзилда амалга ошириш.

Сертификат олиш учун, талабгор, электрон реестрга Ягона идентификация тизими (OneID) орқали кириб, аризани реал вақт режимида қуйидаги маълумотларни ва ҳужжатларни тақдим этган ҳолда тўлдиради:

• солиқ тўловчининг идентификация рақами (СТИР);
• ташкилий-ҳуқуқий шакли кўрсатилган тўлиқ фирма номи;
• тўлиқ почта манзили, телефон рақами, электрон почта манзили;
• майнинг ускуналарини ўрнатиш учун мўлжалланган жойнинг манзили.

Рўйхатга олувчи орган томонидан сертификат олиш учун тақдим этилган маълумотлар ва ҳужжатларни кўриб чиқиш учун йиғим ундирилмайди. Сертификат бериш ёки беришни рад этиш тўғрисидаги қарор электрон реестрда аризани барча зарур маълумотларни ва ҳужжатларни тақдим этган ҳолда тўлдирилган кундан бошлаб йигирма кундан ошмайдиган муддатда қабул қилинади.Сертификат 12 ой муддат амал қилади, шундан сўнг уни узайтириш учун яна шунча маблағ тўлаш керак бўлади. Йиғим пули тўланмаса сертификатнинг амал қилиниши тўхтатилади.