Россия 1918 йилдан бери биринчи марта ташқи қарз бўйича дефолтга учради. Бу нимани англатади?

Россия бир асрдан бери биринчи марта хорижий валютадаги қарзи бўйича дефолтга учради. Бу ҳақда Bloomberg хабар берди.

Мамлакат бир неча ой давомида санкциялардан ҳимояланишга ҳаракат қилди. Аммо 27 май санасида 100 млн долларга яқин фоизли тўловлар бўйича имтиёзли давр тугади, бу эса дефолт ҳодисаси ҳисобланади.

Бу Россиянинг иқтисодий, молиявий ва сиёсий жиҳатдан четланган давлатга айланиб қолишнинг белгисидир.

Иқтисодиёт ва бозорларга етказилган зарарни ҳисобга олсак, дефолт ҳозирча фақат рамзий маънога эга. Бу кучаяётган инфляцияга ва сўнгги йиллардаги энг ёмон иқтисодий инқирозга дуч келган россияликлар учун унчалик аҳамиятга эга эмас.

Россия ҳар қандай қарзини тўлаш учун маблағи бўлса-да, тўловни амалга ошира олмади.

Кейинроқ санкциялар туфайли тушиб қолган вазиятини «форс-мажор» деб топиб, ўзининг 40 млрд долларлик суверен қарзини рублда тўлашини эълон қилди.

Дефолт бўйича расмий декларация одатда рейтинг агентликларидан келади, бироқ Европа санкциялари уларни Россия корхоналари рейтингини бекор қилишига сабаб бўлди.

Якуний муддат тугаши билан, асосий эътибор инвесторларнинг кейинги ҳаракатларига қаратилади.

Улар зудлик билан бир қарорга келиши шарт эмас. Санкциялар юмшатилади деган умидда уруш билан боғлиқ вазиятни кузатишни танлаши мумкин.

Вақт улар томонда: облигация ҳужжатларига кўра, даъволар фақат тўлов санасидан бошлаб уч йил ўтгач ўз кучини йўқотади.

Токиодаги Номура тадқиқот институти иқтисодчиси Такаҳиде Киучига кўра, облигация эгаларининг катта қисми кутишни афзал кўради.

Аввалроқ вазият шунга ишора қилаётган бўлса ҳам Россия дефолтни инкор этаётгани ҳақида хабар берилганди.