Марҳум актёр Алишер Ҳамроев роли учун 21 йилдан сўнг мукофотланди. «Ватан остонаси» фильмининг премьерасидан репортаж (фото, видео)

Республика Кинематография агентлиги буюртмасига кўра режиссёр Ҳилол Насимов «Ватан остонаси» номли фильмни суратга олди. Пойтахтдаги «Киночилар уйи»да фильмнинг илк очиқ премьераси бўлиб ўтди. «Дарё» мухбирлари премьерага ташриф буюриб, киноижодкорларнинг фильм борасидаги фикрлари билан қизиқди.

Фильмда Бобур Йўлдошев, Карим Мирходиев, Фарҳод Абдуллаев, Фотиҳ Насимов, Зумрад Эшонқулова, Ангелина Турсоатова, Раъно Шодиева, Вазира Юнусова, Баҳром Усмонов каби актёрлар ўзига хос ролларни ижро этган.

Фильмда чегарачиларнинг машаққатли ҳаёти, улар учрайдиган хавф-хатарлар ва жамиятдаги ўрни кўрсатилган. Ёдингизда бўлса, 2001 йили «Остона» номли сериал эфир юзини кўрганди. Ҳилол Насимов ана шу сериалнинг мантиқий давоми сифатида «Ватан остонаси» фильмини суратга олганини маълум қилди.

Бу суратни кўриб кўз қувонади. Қанийди, барча фильмларнинг намойишига қизиқиш шундай юқори бўлса.

«Чегара», «Меҳр операцияси» ва «Ватан остонаси» — фильм номи катта экранга чиққунига қадар бир неча бор ўзгарди. Бунинг сабабини сўраганимизда, режиссёр Ҳилол Насимов бу саволимизга жавоб беролмаслигини айтиб ўтди.

«Ватан остонаси» фильми нафақат Ўзбекистон чегараларида ва Туркиянинг Сурия билан чегарадош шаҳарларида ҳам суратга олинди. Хатарли ҳудудларда кечган съёмка жараёнларини актёрлар қуйидагича хотирлайди.

— Сурхондарёнинг Афғонистон билан чегарадош ҳудудида суратга олиш ишлари бошланганида, мамлакатда нотинч вазият эди. Сценарий бўйича икки давлат ўртасидан оқиб ўтган Амударёда солда оқиб ўтишим керак эди. Ҳеч қандай ҳимоя воситаларисиз оддий солда бир неча бор оқишимга тўғри келди. Энг қизиғи, у ерда кимдир менга қатара ўқ узиши ҳам мумкин экан. У ерда кино олинаётганини одамларга тушунтириб бўлмасди. Кейин Чотқолдаги Угам дарёсида ҳам оқишга тўғри келди. У ернинг суви жуда тез оқади ва ҳар қадамда катта ҳарсангтошлар бор. Сол ҳарсангтошга урилиб, парча-парча бўлиб кетиши ҳеч гап эди.

Суратга олиш ишлари бошланганида Суриядаги вазият бироз барқарор эди. Аммо бу эмин-эркин суратга олиш мумкин, дегани эмас. Ўша ердаги одамларда шубҳа туғдирмаслик учун худди улардек кийинишга ҳаракат қилардик. Кейин тонировкали машиналарда ўтириб, шубҳали инсонлар йўқлигига ишонч ҳосил қилгач, машинадан тушиб рол ўйнардик. Бундан вазият нафақат актёрларга балки техник жамоага ҳам ноқулайлик туғдирган, — дейди актёр Фотиҳ Насимов.

— Суратга олиш ишлари якунлангандан кейин «Шу ерда уруш бўляпти», дейишди. Шундан кейин ҳавотирга тушдик. Чунки Суриядаги вазият ҳақида кўп эшитгандим. Аммо ўша ҳудудга бориб, фильмда суратга тушаман, деб ўйламагандим, — дейди актриса Вазира Юнусова.

Премьерадан аввал ДХХ чегара қўшинлари раҳбаряти томонидан бир гуруҳ ижодкорлар тақдирланди. Улар орасида «Остона» сериалида фидойи чегарачи ролини ижро этган актёр Алишер Ҳамроев номи ҳам эътироф этилди. Мукофотни марҳум актёрнинг фарзандлари Мадина ва Искандар Ҳамроевлар қабул қилиб олди.

Актёр Валижон Шамсиев «Остона» сериалида оддий аскар Баротов ролини ижро этганди. Орадан 21 йил ўтиб, «Ватан остонаси» фильмида ҳам суратга тушди. Премьера учун Туркиядаги саёҳатидан эртароқ қайтишга қарор қилганини айтди.

«Ватан остонаси» 4-қисмли киносериал ҳисобланади. Ҳозирча республика кинотеатрларида фильмнинг фақат бир қисмли жамланмаси намойиш этилмоқда. Унинг давоми кейинроқ телеканалларда намойиш этилади.