Marhum aktyor Alisher Hamroyev roli uchun 21 yildan so‘ng mukofotlandi. “Vatan ostonasi” filmining premyerasidan reportaj (foto, video)

Respublika Kinematografiya agentligi buyurtmasiga ko‘ra rejissor Hilol Nasimov “Vatan ostonasi” nomli filmni suratga oldi. Poytaxtdagi “Kinochilar uyi”da filmning ilk ochiq premyerasi bo‘lib o‘tdi. “Daryo” muxbirlari premyeraga tashrif buyurib, kinoijodkorlarning film borasidagi fikrlari bilan qiziqdi.

Filmda Bobur Yo‘ldoshev, Karim Mirxodiyev, Farhod Abdullayev, Fotih Nasimov, Zumrad Eshonqulova, Angelina Tursoatova, Ra’no Shodiyeva, Vazira Yunusova, Bahrom Usmonov kabi aktyorlar o‘ziga xos rollarni ijro etgan.

Filmda chegarachilarning mashaqqatli hayoti, ular uchraydigan xavf-xatarlar va jamiyatdagi o‘rni ko‘rsatilgan. Yodingizda bo‘lsa, 2001-yili “Ostona” nomli serial efir yuzini ko‘rgandi. Hilol Nasimov ana shu serialning mantiqiy davomi sifatida “Vatan ostonasi” filmini suratga olganini ma’lum qildi.

Bu suratni ko‘rib ko‘z quvonadi. Qaniydi, barcha filmlarning namoyishiga qiziqish shunday yuqori bo‘lsa.

“Chegara”, “Mehr operatsiyasi” va “Vatan ostonasi” — film nomi katta ekranga chiqquniga qadar bir necha bor o‘zgardi. Buning sababini so‘raganimizda, rejissor Hilol Nasimov bu savolimizga javob berolmasligini aytib o‘tdi.

“Vatan ostonasi” filmi nafaqat O‘zbekiston chegaralarida va Turkiyaning Suriya bilan chegaradosh shaharlarida ham suratga olindi. Xatarli hududlarda kechgan syomka jarayonlarini aktyorlar quyidagicha xotirlaydi.

— Surxondaryoning Afg‘oniston bilan chegaradosh hududida suratga olish ishlari boshlanganida, mamlakatda notinch vaziyat edi. Ssenariy bo‘yicha ikki davlat o‘rtasidan oqib o‘tgan Amudaryoda solda oqib o‘tishim kerak edi. Hech qanday himoya vositalarisiz oddiy solda bir necha bor oqishimga to‘g‘ri keldi. Eng qizig‘i, u yerda kimdir menga qatara o‘q uzishi ham mumkin ekan. U yerda kino olinayotganini odamlarga tushuntirib bo‘lmasdi. Keyin Chotqoldagi Ugam daryosida ham oqishga to‘g‘ri keldi. U yerning suvi juda tez oqadi va har qadamda katta harsangtoshlar bor. Sol harsangtoshga urilib, parcha-parcha bo‘lib ketishi hech gap edi.

Suratga olish ishlari boshlanganida Suriyadagi vaziyat biroz barqaror edi. Ammo bu emin-erkin suratga olish mumkin, degani emas. O‘sha yerdagi odamlarda shubha tug‘dirmaslik uchun xuddi ulardek kiyinishga harakat qilardik. Keyin tonirovkali mashinalarda o‘tirib, shubhali insonlar yo‘qligiga ishonch hosil qilgach, mashinadan tushib rol o‘ynardik. Bundan vaziyat nafaqat aktyorlarga balki texnik jamoaga ham noqulaylik tug‘dirgan, — deydi aktyor Fotih Nasimov.

— Suratga olish ishlari yakunlangandan keyin “Shu yerda urush bo‘lyapti”, deyishdi. Shundan keyin havotirga tushdik. Chunki Suriyadagi vaziyat haqida ko‘p eshitgandim. Ammo o‘sha hududga borib, filmda suratga tushaman, deb o‘ylamagandim, — deydi aktrisa Vazira Yunusova.

Premyeradan avval DXX chegara qo‘shinlari rahbaryati tomonidan bir guruh ijodkorlar taqdirlandi. Ular orasida “Ostona” serialida fidoyi chegarachi rolini ijro etgan aktyor Alisher Hamroyev nomi ham e’tirof etildi. Mukofotni marhum aktyorning farzandlari Madina va Iskandar Hamroyevlar qabul qilib oldi.

Aktyor Valijon Shamsiyev “Ostona” serialida oddiy askar Barotov rolini ijro etgandi. Oradan 21 yil o‘tib, “Vatan ostonasi” filmida ham suratga tushdi. Premyera uchun Turkiyadagi sayohatidan ertaroq qaytishga qaror qilganini aytdi.

“Vatan ostonasi” 4-qismli kinoserial hisoblanadi. Hozircha respublika kinoteatrlarida filmning faqat bir qismli jamlanmasi namoyish etilmoqda. Uning davomi keyinroq telekanallarda namoyish etiladi.