Рақсга тушади, шеър ёзади, комиксларни яхши кўради: фильмдаги образларидан бутунлай фарқ қиладиган актёр ва актрисалар (фото)

Суратга олиш майдончасида актёрлар турли қаҳрамонларга айланишлари керак. Кўпинча рол ижрочиси ва унинг қаҳрамони ўртасида умумийлик бўлмайди. Ҳаётда экрандаги ёвуз яхши хулқли одам бўлиб чиқиши мумкин, ёки аксинча фильмдаги жиддий образ қувноқ аёлга айланади.

Энтони Хопкинс

Энтони Хопкинс ўзининг кучли драматик роллари, жумладан, ёвуз қаҳрамонлари билан машҳур. Унинг энг даҳшатли қаҳрамонларидан бири — маккор Ганнибал Лектер, у одамларнинг устидан кулиш билан бирга, бир қарашда ҳаммани қўрқитади ҳам.

Аслида Хопкинс яхши одам. У ҳозир 80 ёшда, кўп вақтини ижтимоий тармоқларда ўтказади. Актёр замонавий мусиқа остида рақсга тушгани ва мушуги билан пианино чалаётгани тасвирланган видеоларини улашиб, мухлисларини қувонтиради.

Меган Фокс

Меган доим саргузашт излаб юрадиган соҳибжамол каби роллари билан танилган. У бундай қаҳрамонларни, масалан, «Трансформерлар» ва «Нинза тошбақалар» фильмларида ўйнаган. Аммо ҳақиқий ҳаётда актриса хотиржам вақт ўтказишни танлайди.

Унинг сўзларига кўра, у камдан кам ҳолларда уйдан чиқади ва ўзини муаммолардан узоқроқ тутади. Фокс тунги базмлардан кўра Гарри Поттер ҳақидаги комикслар ва китобларни ўқишни афзал кўради.

Зои Салдана

Зои кўплаб жангари фильмларда рол ўйнаган. Масалан, «Галактика қўриқчилари» сериалида у дунё ҳимоячисига айланган хавфли ёлланма аскар Гамора қиёфасида пайдо бўлади. Аммо актрисанинг ўзи анча хотиржам ва тартибли ҳаёт кечиради.

Унинг учта фарзанди бор ва Зои она ролини энг қийин рол деб атайди. У ўзига вақт ажратишни, дам олишни ва болалар билан ўйнашни муҳим деб билади.

Роуэн Аткинсон

Роуэн ўзининг аҳмоқлиги туфайли кулгили вазиятларга тушиб қолган ғайриоддий жаноб Бин роли билан машҳур. Аткинсон қаҳрамонидан кўра ақллироқ эканлиги аниқ. Масалан, у магистрлик даражасига эга. Актёрлик фаолиятини бошлашдан олдин у Оксфорд университетида электротехника бўйича таҳсил олган.

Стефани Беатрис

Актрисанинг энг кўзга кўринган ролларидан бири «Бруклин 9-9» телесериалидаги детектив Роза Диаздир. Бу қаҳрамон камдан кам табассум қилади, паст овозда гапиради ва ҳар доим қора кийим кияди. Реал ҳаётда эса қувноқ Стефани ўзини жуда бошқача тутади, одамлар у ва унинг персонажи ўртасидаги қарама-қаршиликдан ҳайратда қолишларини таъкидлайди.

Омар Си

Омар «1+1» ва «2+1» фильмларида бепарво оддий йигит роллари туфайли машҳур бўлди. Аммо ҳаётда у жиддий оилапарвар одам. Си 2007 йилда 10 йил давомида учрашиб юрган севгилиси билан оила қурди. Ҳозирда эр-хотиннинг 5 нафар фарзанди бор.

Мишел Родригес

Фильмларда актриса кўпинча эркакшода қиз ролини ўйнайди. Унинг қаҳрамонлари ташқи кўринишига аҳамият бермайди, улар асосан кучли муштларига ишонади. Бироқ Мишелнинг ҳаётдаги услуби фильмдагидан бошқача. Расмий тадбирларда у ҳашаматли либосларда кўриниш беради ва қизил гиламда маликага айланади.

Вигго Мортенсен

Виггонинг қаҳрамонлари қаттиққўллиги билан ажралиб туради. У «Узуклар ҳукмдори» трилогиясида жангчи Арагорн, «Яшил китоб»да эса қўпол муштумзўр ролини ўйнаган. Аммо ҳаётда Мортенсен ижодкор одам. У шеър ёзади, расм чизади, мусиқа ва фотосуратларни яхши кўради.

Тилда Суинтон

Актриса жуда кўп даҳшатли ёвуз одамларни, жумладан, «Нарния йилномалари: Арслон, жодугар ва сеҳрли шкаф» фильмидаги қиролича Жадис ролини ўйнаган.

Аслида Тилда фитна ва шафқатсизлик қиладиган аёл эмас. Аксинча, актриса фойдали ижтимоий фаолият билан шуғулланади. Масалан, Суинтон Шотландияда мактабга асос солган.