Энди Ўзбекистон фуқароларидан ёшга доир, ногиронлик ва боқувчисини йўқотганлик пенсияларини тайинлаш жараёнида оила таркиби тўғрисидаги маълумотлар талаб этилмайди. Бу ҳақда Бюджетдан ташқари пенсия жамғармаси хабар қилди.
Қайд этилишича, жамғарма томонидан фуқароларга кўрсатилаётган хизматлар сифатини ошириш, шунингдек, давлат пенсияларини тайинлашда фуқаролардан талаб этиладиган ҳужжатларни босқичма-босқич қисқартириш мақсадида Адлия вазирлиги ва Пенсия жамғармаси маълумотлар базалари ўртасида ахборот алмашинуви йўлга қўйилган.
Ушбу ахборот алмашинуви орқали давлат пенсияларини тайинлашда фуқароларнинг оила таркиби тўғрисидаги зарур маълумотлари автоматик тарзда шакллантириш тизими йўлга қўйилган. Эндиликда пенсия тайинлашда никоҳ, ажрим ва фарзандларингизнинг туғилганлик тўғрисидаги гувоҳномалари ва уларнинг нусхалари талаб этилмайди.
Аввалроқ Президент қарорига мувофиқ 4 миллиондан зиёд пенсия ва нафақа олувчиларга 1,3 трлн сўм молиялаштириб берилгани, ижтимоий ҳимояга муҳтож шахсларнинг коммунал тўловлари компенсация қилиниши мумкинлиги ҳақида хабар берилган.
Изоҳ (0)