Ukraina prezidenti Vladimir Zelenskiy Ukraina Xavfsizlik xizmati (UXX) rahbari Ivan Bakanovni lavozimidan ozod qilishni rejalashtirmoqda. Bu haqda Zelenskiyga yaqin to‘rt nafar ukrainalik amaldor va Kiyevga UXXni isloh qilish bo‘yicha maslahat bergan g‘arblik bir diplomatning so‘zlariga tayanib, Politico xabar berdi.
Nashr manbalariga ko‘ra, Bakanov urush paytidagi bir qator muvaffaqiyatsizliklar va Xersonning boy berilishidan keyin Ukraina prezidentining ishonchini yo‘qotgan. “Biz uning ishidan juda norozimiz va undan qutulishga harakat qilmoqdamiz”, — dedi Zelenskiyga yaqin ukrainalik yuqori martabali amaldor Politico nashriga.
Nashr suhbatdoshlarining ta’kidlashicha, gap nafaqat Bakanov haqida, balki UXXning boshqa yuqori martabali amaldorlarining urushning dastlabki soatlari va kunlaridagi qarorlari haqida ham ketmoqda — bu qarorlar oqibatida Ukraina, xususan, strategik ahamiyatga ega Xersonni yo‘qotdi. UXXning Xersondagi rahbari Sergey Krivoruchko rus qo‘shinlari bostirib kirishidan oldin shaharni evakuatsiya qilishni buyurgan, uning yordamchisi Igor Sadoxin esa ruslarga minalangan maydonlar xaritasini topshirgan. UXXning ikkala xodimi ham davlatga xiyonatda ayblanib hibsga olingan.
Bundan tashqari, Ukraina rasmiylariga ko‘ra, UXX zobitlari Dnepr orqali Xersonga o‘tuvchi Antonovskiy ko‘prigini portlatib yubormagani uchun 3-mart kuni Rossiya qo‘shinlari shaharni osongina egallab olgan.
Ukraina prezidenti ofisi ham, Ivan Bakanov yoki UXX ham bu haqda hozircha izoh bermadi.
Ivan Bakanov — Vladimir Zelenskiyning bolalikdagi do‘sti. Bakanov 2019-yil avgustida, Zelenskiy prezident bo‘lganidan uch oy o‘tib Ukraina Xavfsizlik xizmati rahbari bo‘lgan edi. So‘nggi paytlarda, deb yozadi Politico, ikki do‘st kamdan-kam va faqat hukumat masalalarida muloqot qilmoqda.
Izoh (0)