Буюк Британияга ноқонуний равишда келган украиналиклар Руандага (Шарқий Африкадаги давлат) юборилиши мумкин, деди бош вазир Борис Жонсон. Бу ҳақда The Guardian газетаси хабар бермоқда.
«Одамларни Руандага юбориш эҳтимоли бўлган ягона ҳолат — агар улар Буюк Британияга ноқонуний равишда келса ва шу тариқа биздаги хавфсиз ва қонуний йўналишларга путур етказса», — деди Жонсон Руанда пойтахти Кигали шаҳрига ташрифи чоғида.
«Биз украиналикларга 130 мингта виза берамиз ва уларда мамлакатга кириш учун камида иккита жуда яхши йўл бор», — деди у.
Унинг сўзларига кўра, назарий жиҳатдан Руандага депортация ҳолати содир бўлиши мумкин, аммо бу «даргумон».
Апрель ойида Буюк Британия бош вазири Борис Жонсон миграция бўйича янги давлат сиёсатини эълон қилганди: энди Буюк Британияга ноқонуний йўллар билан келган одамлар қочқин мақомини олиш учун Руандага юборилиши мумкин.
Жонсоннинг сўзларига кўра, бу ташаббус Буюк Британияга одамларни ноқонуний олиб келиш билан шуғулланувчи жиноий гуруҳларнинг бизнес моделини йўқ қилишга қаратилган. Янги тизим одамларга Руандага хавфсиз саёҳат қилиш ва у ерда қочқинлик мақомини олиш учун ариза топшириш, агар расмийлар томонидан рухсат берилса, у ерда қолиб, янги ҳаёт қуриш имконини беради.
Изоҳ (0)