Россиядаги қурилиш майдончаларида 2020 йилга нисбатан тўрт баравар кам меҳнат муҳожирлари ишламоқда

Россияда меҳнат муҳожирлари сони 500 минг кишигача камайди, бу 2020 йил охиридаги кўрсаткичнинг чорак қисмини ташкил этади, деб ёзмоқда «РИА Недвижимост» Қурувчилар миллий ассоциацияси («Нострой») президенти Антон Глушковга таяниб.

Глушковнинг айтишича, 2020 йил охирида, расмий статистик маълумотларга кўра, қурилиш объектларида 800 минг, экспертлар ҳисобига кўра, 2 миллионга яқин мигрант ишлаган.

«Бугунги кунда расмий статистик маълумотлар деярли йўқ, чунки муҳожирларнинг барчаси бизга сайёҳ сифатида келмоқда. Ҳисоб-китобларга кўра, бугунги кунда қурилишда 500 мингга яқин муҳожир бор, бу аввалги кўрсаткичнинг чорак қисмига тенг», — деди Глушков.

Унинг таъкидлашича, Россия вилоятлари ҳозирда меҳнат муҳожирларининг энг катта тақчиллигини бошдан кечирмоқда, чунки Москва, Санкт-Петербург ва бир нечта йирик шаҳарлар иш ҳақи ошгани сабабли мавжуд оқимни тўлиқ ортга қайтариб юбормоқда.

Глушковнинг сўзларига кўра, муҳожирлар анъанавий тарзда пардозлаш ишлари билан шуғулланган. Бугунги кунда бу ишга россиялик мутахассисларни жалб қилиш деярли кузатилмаяпти, шунинг учун мамлакатда уй-жойларни тайёр безак билан таъминлаш камайди, деди у.

«Қурувчилар бундай мутахассисларга бўлган эҳтиёжни минималлаштирадиган маҳсулот ишлаб чиқаришга ҳаракат қилмоқда. Шу боис white bох (оқ қути) кўринишидаги уй-жойлар ҳажми сезиларли даражада ошди», — дея хулоса қилди уюшма раҳбари.

Айни пайтда, Россия Қурилиш вазирлиги раҳбари Ирек Файзуллин «РИА Недвижимост»га айтишича, вазирликка қурилиш компанияларидан мигрантлар етишмаслиги муаммоси билан боғлиқ аризалар келиб тушмаяпти.

«Барқарор режимда Қурилиш вазирлиги аввал эълон қилинган пандемия чораларини ишлаб чиқмоқда. Шу билан бирга, бизда ишчи кучи етишмаслиги бўйича оғир мурожаатлар йўқ», — деди у.

Файзуллиннинг сўзларига кўра, ҳукуматнинг идоралараро ишчи гуруҳи «Ўзбекистон ва Тожикистондан келган ишчилар масаласида аниқ ишламоқда».

Бундан ташқари, вазирнинг қўшимча қилишича, дўст бўлмаган мамлакатларнинг санкцияларига қарши кураш доирасида Қурилиш вазирлиги ишчи кучи яратишнинг янги йўналишларини ишлаб чиқмоқда.