Чехия ҳукумати Россия ва Беларусь фуқароларига виза ва яшаш учун рухсатномалар бериш тақиқини 2023 йил март ойи охиригача узайтирди. Ушбу тақиқ Россия Украинага бостириб кира бошлаганидан кўп ўтмай жорий этилганди.
Тақиқ илгари берилган яшаш рухсатномаларини узайтиришга, гуманитар характердаги ва бошқа бир қатор ҳолатларга тааллуқли эмас — хусусан, ариза берувчи Чехияда яшаш рухсатномасига эга бўлган чет эл фуқаросининг оила аъзоси бўлса ва узоқ муддатли яшаш учун рухсат сўраётган бўлса, тақиқ унга таъсир кўрсатмайди.
Низомнинг мақсади Россия ва Беларусга босим ўтказиш, уларнинг тажовузкорлигини тўхтатиш ва Чехия хавфсизлигини таъминлашдир.
Россия Украинага бостириб киргандан сўнг, Чехиядан ташқари, Латвия, Литва ва Эстония ҳам россияликлардан виза учун аризаларни қабул қилишни тўхтатди. Ушбу мамлакатларнинг дипломатлари Россиядан чиқариб юборилгач, қатор консулхоналар виза беришни тўхтатди.
Июнь ойи ўртасида Украина россияликлар учун виза режимини жорий қилди. Қонун 1 июлдан кучга киради. Бунга қадар россияликларнинг Украинага кириши учун виза талаб қилинмас эди.
Изоҳ (0)