Пандемия ва Украинадаги уруш зарбаларига қарамай, Ўзбекистон иқтисодиёти барқарорликни намойиш этди. Бу ҳақда Халқаро валюта жамғармаси (ХВЖ) хабар берди.
Пандемия 2020 йилда савдо, туризм ва транспортда кескин секинлашувга олиб келди. Шунга қарамай, реал ўсиш 1,9 фоизда ижобий бўлиб қолди. Йил охирида инфляция 11 фоизга тушди.
2021 йилда 7,4 фоизга иқтисодий ўсиш кузатилди. Глобал нархлар босимига қарамай, қатъий пул-кредит сиёсати инфляцияни 2021 йил охиригача 10 фоизгача камайтиришга ёрдам берди.
Савдо ва пул ўтказмаларининг тикланиши билан жорий ҳисоб тақчиллиги бироз ошиб, ЯИМнинг 7 фоизини ташкил этди. Ижтимоий ёрдам, инвестициялар ва сиёсий кредитлар кўринишидаги давлатнинг иқтисодий қўллаб-қувватлаши умумий бюджет тақчиллигини 2 фоиз пунктга ошириб, ЯИМнинг 6,2 фоизини ташкил этди.
Ўзбекистоннинг Россия билан яқин иқтисодий алоқаларини ҳисобга оладиган бўлсак, 2022 йилга бўлган истиқбол Украинадаги уруш оқибатлари ва Россияга қарши санкцияларга боғлиқ бўлади.
Россиядан пул ўтказмалари, савдо ва молиялаштириш секинлашиши кутилмоқда, бу 2022 йилда ўсишни 3-4 фоизга қисқартиради ва жорий ҳисоб тақчиллигини 8,5 фоизгача оширади.
Глобал озиқ-овқат ва хом ашё нархлари юқори бўлганлиги сабабли, инфляция 10 фоиздан ортиқ даражада сақланиб қолиши кутилмоқда. Бироқ ноаниқлик юқори.
ХВЖ давлат корхоналари томонидан юзага келиши мумкин бўлган фискал хавфларни бартараф этиш билан бирга, даромадларни йиғиш ва харажатлар самарадорлигини оширишни давом эттириш зарурлигини таъкидлади.
Шунингдек, молиявий барқарорликни таъминлаш марказий банкнинг назорат ва макропруденсиал тизимини кучайтиришни, шу билан бирга банкларни яқиндан кузатиб боришни тавсия қилди.
Аввалроқ асосий ставкани 16 фоизгача пасайгани нимани англатиши ва энди Ўзбекистонда нима ўзгариши ҳақида хабар берилган эди.
Изоҳ (0)