Экспорт импортдан қарийб 4 млрд доллар кам: Ўзбекистоннинг йил бошидан бери ташқи савдо айланмаси маълум бўлди

Ўзбекисоннинг 2022 йил январь—май ойларидаги ташқи савдо айланмаси маълум бўлди. Бу ҳақда Давлат статистика қўмитаси хабар бермоқда. 

Жорий йилнинг дастлабки 5 ойида ташқи савдо айланмаси 20,5 млрд долларни ташкил қилган. Ўтган йилнинг шу даврига нисбатан бу кўрсаткич ўтган йилнинг шу даврига нисбатан 5,5 млрд долларга кўпроқдир.

Январь—май ойларига кўра экспорт 8,3 млрд доллар бўлган бўлса, импорт 12,1 млрд долларга етган. 2021 йилнинг илик 5 ойида бу кўрсаткичлар мос равишда 5,7 млрд доллар ва 9,2 млрд доллар эди. 

Ўзбекистон 5 ой ичида қарийб 3 млрд долларлик олтин сотган. Ўтган йилнинг шу даврида 1,2 млрд долларлик олтин сотилган эди. Орадаги фарқ 2,5 борабарга кўпайган. 

Бошқа мамлакатлардан 11,2 млрд долларлик товарлар олиб келинган бўлса, Ўзбекистон чет элга 4,2 млрд долларлик товарлар сотган. Орадаги фарқ — 7 млрд доллар. 

Олтиннинг кўп сотилаётгани ҳисобига Ўзбекистон экспорти ўтган йилнинг шу даврига нисбатан 45,5 фоизга ўсган. 

2022 йилнинг январь—май ойларида 3,8 млрд долларлик пассив ташқи савдо баланси кузатилди. 

Ўзбекистон энг кўп савдо қилаётган 10 та давлатдан 8 тасига камроқ сотиб, улардан кўпроқ сотиб олмоқда.  

Ўзбекистон дунёнинг 167 мамлакати билан савдо алоқаларини амалга ошириб келмоқда. 

Ташқи савдо айланмасининг нисбатан салмоқли ҳиссаси Хитой (18,5 фоиз), Россия (15,8 фоиз), Қозоғистон (8,5 фоиз), Туркияда (7,0 фоиз), Корея (5,3 фоиз), Германия (2,4 фоиз) ва Қирғиз Республикасида (2,1 фоиз) қайд этилган.

Ўзбекистон кимга нима сотди

Биринчи ўринда олтин (улуши 35,5 фоиз). Иккинчи ўринда  саноат товарлари (23,1 фоиз), учинчи ўринда хизматлар (13,4 фоиз).

Миқдорлар ҳақида гапирадиган бўлсак, олтин 2,97 млрд долларга, саноат товарлари 1,9 млрд долларга, хизматлар эса 1,1 млрд долларга сотилган.

Ўғитлар ва энергия ишлаб чиқарувчи машиналар экспорти бир неча баравар ошди, аммо сабзавот ва мевалар, ёғлар, электр токи, чўян, пўлат ва олтин савдоси камайди.

12,6 фоиз улуш билан Хитой асосий харидор бўлган. Иккинчи ўринда Россия (11,2 фоиз), учинчи ўринда Туркия (8,9 фоиз).

Тошкент шаҳри, Тошкент ва Андижон вилоятлари хорижга энг кўп маҳсулот сотган. Энг кам сотганлар — Сурхондарё,  Хоразм ва Жиззах вилоятлари.

Ўзбекистон кимдан нима сотиб олди

Биринчи ўринда аввалги йиллардаги каби саноатни ривожлантириш учун машина ва ускуналар (34,1 фоиз).

Иккинчи ўринда саноат маҳсулотлари (18,2 фоиз), учинчи ўринда кимёвий воситалар ва шунга ўхшаш маҳсулотлар (13,8 фоиз).

Ўзбекистон энг кўпи Хитой (22,5 фоиз), Россия (18,9 фоиз) ва Қозоғистондан (10,4 фоиз) харид қилган.

Ҳудудлар бўйича энг кўп импорт қилинган маҳсулотлар Тошкент шаҳри, Тошкент ва Андижон вилоятларига тўғри келади. Энг ками — Қашқадарё, Қорақалпоғистон ҳамда Сурхондарё вилоятига.