Европа Россия газидан бутунлай воз кечишга тайёрланмоқда

Халқаро энергетика агентлиги (IEA) Европа бу қишда Россия гази экспортини тўлиқ тўхтатишга тайёргарлик кўриши кераклиги ҳақида огоҳлантирди. Бу ҳақда The Financial Times хабар берди.

IEA давлат ҳукуматларини талабни камайтириш ва эскирган атом электр станцияларини очиқ сақлаш чораларини кўришга чақирди.

Европа Россия гази экспорти бутунлай тўхтаб қолишига тайёр бўлиши керак, — деди IEA раҳбари Фотиҳ Бирол.

Унга кўра, Россиянинг газ оқимини қисқартириши Европага омборларини тўлдириш учун тўсқинлик қилиш ва қиш ойларида мамлакатга ўз таъсирини кучайтиришга қаратилган.

Бу ҳафта Европа давлатлари томонидан газга бўлган талабни камайтириш учун эски кўмир билан ишлайдиган электр станцияларини ишга тушириш чораси инқироз кўлами билан оқланади.

Биролнинг сўзларига кўра, кўмир ишлаб чиқаришни кўпайтириш вақтинчалик чора. У қишда иситиш учун газ таъминотини сақлаб қолишга ёрдам беради.

Юқори даражада ифлослантирувчи кўмирни ёқиш натижасида юзага келадиган ҳар қандай қўшимча CО₂ чиқиндилари Европанинг импорт қилинадиган ёқилғига боғлиқлигини камайтириш ва қайта тикланадиган энергия ишлаб чиқариш қувватларини ошириш билан қопланади.

Агар Россия экспорти тўлиқ тўхтатилса, Европа ҳукуматлари томонидан кўрилган чоралар етарли бўлмагани англашилиб қолади. Шу сабабли мамлакатлар қиш олдидан захираларни тўлдиришни таъминлаш учун ҳозирда ҳамма нарса қилишлари керак, — деди у.

IEA раҳбарининг таъкидлашича, мамлакатлар электр энергияси ишлаб чиқаришда ёқилган газ миқдорини чеклашга ёрдам бериш учун мўлжалланган ҳар қандай атом энергетика объектларини ёпишни кечиктиришга ҳаракат қилиши керак.

Европада энергетикага жами инвестициялар жорий йилда 8 фоизга ўсиши ва 2,4 триллион долларни ташкил этиши кутилмоқда, бу ўсиш қайта тикланадиган манбалар ва юқори харажатлар ҳисобидан келади.

Европанинг Россия энергетикасига қарамлигидан халос бўлиш истагидан келиб чиққан ҳолда энергиянинг тоза шаклларига инвестициялар ўсишининг баъзи ижобий белгилари мавжуд бўлса-да, у глобал миқёсда муваффақият қозонмаган.

2015 йилдан бери Хитойдан ташқари ҳеч қайси давлатда қайта тикланадиган энергияга инвестициялар реал кўринишда ўсмаган. Ривожланаётган дунёнинг кўп қисмида тоза энергия инвестицияларининг нисбатан заифлиги энг хавотирли тенденциялардан биридир.

Аввалроқ Россия иқтисодиёти нега Европанинг газ эмбаргосидан зарар кўрмаётгани ҳақида хабар берилганди.