Фарғона шаҳрида Жанубий Корея халқаро ҳамкорлик агентлиги — KOICA билан шерикликда ташкил этилган ишсиз фуқароларни касб-ҳунарга ўқитиш маркази иш бошлади. Президент Шавкат Мирзиёев жорий йил май ойида Фарғонага ташрифи давомида ушбу марказ фаолияти билан танишганди. Давлат раҳбари ўқув жараёнларини кўздан кечириб, ёшлар ва хотин-қизлар билан суҳбатлашганди.
«Ўқиш, изланишга ҳеч қачон кеч эмас. Келиб, касб ўрганаётганингиз эртанги кунингизга бефарқ эмаслигингиздан далолат. Бироз қийин бўлар. Лекин ўзингизни, фарзандларингиз келажагини ўйласангиз, шунга қунт қилинг. Қийинчилик ўтиб кетади, сиз бойлик яратяпсиз», — деган эди Президент учрашув давомида.
«Дарё» мухбири Азизжон Эрматов ушбу марказда бўлиб, ишсиз фуқароларни касб-ҳунарга ўқитиш жараёни билан танишди.
Маълум қилинишича, ушбу мажмуада электроника, ахборот технологиялари, автомобилсозлик, тикувчилик, сартарошлик-косметология каби талаб юқори касблар бўйича мутахассислар тайёрланади.
Марказга таълим жараёнида фойдаланиладиган 538 турдаги замонавий ускуна ва жиҳозлар Жанубий Кореядан олиб келинган. Ўқув-машғулотлар ҳам ушбу мамлакат дастур ва қўлланмалари асосида ўтилади. Бунинг учун беш нафар кореялик мураббий жалб қилинган.
Марказ Вазирлар Маҳкамасининг «Ўзбекистон Республикасида ишсиз фуқароларни касб-ҳунарга ўқитиш марказларини ташкил этиш чора-тадбирлари тўғрисида»ги қарори асосида ташкил этилган.
Лойиҳани амалга ошириш учун Корея халқаро ҳамкорлик агентлиги томонидан 9 миллион 320 минг доллар миқдорида инвестиция киритилиб, замонавий ўқув ва амалиёт бинолари, ошхона ҳамда спорт залидан иборат мажмуа барпо этилган.
Амалиётга асосий эътибор қаратилган ушбу ўқув марказида бир йилда 480 нафар ишсиз фуқарони касбга ўқитиш имконияти мавжуд. Ўқувчилар 6-8 ойлик курсларда касбий таълим олишади.
«Марказимизда фақат ишсиз фуқаролар касб-ҳунарга ўргатилади. Бу фуқаролар жойлардаги бандликка кўмаклашиш марказларининг йўлланмалари асосида қабул қилинади. Бизда ўқув жараёни 6 ойлик назарий машғулотлар ва икки ойлик ишлаб чиқариш амалиётидан иборат. Марказни битирганларга ўрта махсус маълумот тўғрисидаги диплом берилади. Ҳозирги кунда марказда 240 нафар ўқувчи таълим олмоқда. Касб-ҳунар марказимиз KOICA гранти асосида ташкил қилинган. Марказ қурилиши, жиҳозланиши ҳамда ўқитувчиларнинг малакасини ошириш ишларига 9,3 миллион доллар маблағ сарфланган. Барча йўналишлар бўйича ўқув хоналари Жанубий Кореядан келтирилган энг сўнгги русумдаги ускуналар билан жиҳозланган. Бир йилда икки марта қабул ўтказилади. Ўқувчилар йўлланма асосида навбати билан қабул қилинади. Агар бир йўналиш бўйича талабгорлар сони белгиланган квотадан ошадиган бўлса, улар учун имтиҳон ўтказилади. Математика, она тили, физика фанларидан имтиҳон топширилади. Амалиёт вилоятдаги йирик саноат ва ишлаб чиқариш корхоналарида бўлади. Марказда 16 нафар ўқитувчи фаолият олиб боради. Ўқитувчилар Меҳнат вазирлиги мутахассислари ва кореялик экспертлар иштирокида ўтказилган суҳбат асосида ишга қабул қилинган», — дейди марказ директорининг ўқув ишлари бўйича ўринбосари Одилжон Юнусов.
Бу ерда билим олган ва амалий машғулотларда иштирок этган ёшлар нафақат мамлакат саноат, қурилиш, ахборот технология тармоқларида ишлаш малакасига эга бўлади, балки келажакда хорижий давлатларда ишлаш истагида бўлган меҳнат мигрантларига касб ўргатувчи уста вазифасини ҳам бажара олади.
«Ўтган йили қишлоғимиздаги 2-мактабни тугатганман. Шундан бери бекор юргандим. Бандликка кўмаклашиш маркази ходимларидан шундай ўқиш борлигини эшитдим. Кореяликлар янги ўқув маркази очди, дейишди. Қизиқиб келдим: қарасам шароитлари жуда яхши экан. Шу ерда ўқишга қарор қилдим. Энергетика йўналишини танладим, чунки олдиндан шу соҳага қизиқишим бор эди. Ўқишни бошлаганимизга бир ой бўлиб қолди. 40 ҳафталик ўқув дастури асосида ҳунар ўрганяпмиз. Ишлатаётган техникаларимизнинг ҳаммаси Кореядан олиб келинган. Хонадонларнинг электр монтажига, лифтлар ва кузатув камералари ўрнатишга қизиқаман. Марказдаги ўқиш давомида шу йўналишларни пухта ўрганмоқчиман. Дўстларимга, танишларимга шу марказда ўқишни тавсия қилдим. Ҳатто Россияда юрган дўстларим ҳам келишди. Фақат ўринлар тўлиб қолган экан. Энди улар кейинги қабул пайтида ҳужжат топширишади», — дейди Фурқат тумани Кўкдўппи қишлоғида яшовчи Муҳаммадмирзо Фарҳоджонов.
Изоҳ (0)