Ўзбекистонда ҳоким ёрдамчиларини ҳалолликни кучайтириш бўйича махсус курсларда ўқитиш тизими йўлга қўйилди

Коррупцияга қарши курашиш агентлиги томонидан ўтказилган таҳлилларга кўра, 2022 йилнинг январь—май ойларида ҳоким ёрдамчилари томонидан 14 та жиноят содир этилгани маълум бўлди. Мазкур жиноятларнинг асосий қисмини порахўрлик, мансабдорлик ва фирибгарлик жиноятлари ташкил этади. Бу ҳақда агентлик матбуот хизмати хабар берди.

Таъкидланишича, бундай ҳолатларнинг олдини олиш мақсадида агентлик томонидан Иқтисодий тараққиёт ва камбағалликни қисқартириш вазирлиги ҳузуридаги Маҳаллабай ишлаш ва тадбиркорликни ривожлантириш агентлиги билан ҳамкорликда ҳудудлар кесимида ҳоким ёрдамчиларини коррупцияга қарши кураш ва ҳалоллик бўйича махсус курсларда ўқитиш тизими йўлга қўйилган.

Шунга мувофиқ, 20 июнь санасидан эътиборан мамлакат ҳудудларида «Ўзбекистон Республикасида коррупцияга қарши курашишнинг устувор йўналишлари, давлат хизматчиларида коррупцияга нисбатан муросасиз муносабатни ва унга қарши курашиш бўйича ижобий хулқни шакллантириш» мавзусидаги семинар машғулотлари бошланган.

Семинар машғулотларида Ўзбекистонда коррупцияга қарши курашишнинг устувор йўналишлари ҳамда коррупциянинг олдини олишнинг замонавий механизмларини жорий этиш масалалари юзасидан батафсил маълумот берилмоқда.

Хусусан, коррупцияга қарши курашиш бўйича қабул қилинган норматив-ҳуқуқий ҳужжатлар, коррупциянинг олдини олиш борасида жорий этилаётган янги механизмлар, коррупцияга қарши ички назорат тузилмалари фаолияти, давлат хизматчиларининг мол-мулки ва даромадларини декларациялаш тизимини жорий этиш, манфаатлар тўқнашувини самарали бошқариш йўналишларида амалга оширилаётган ишларга эътибор қаратилмоқда.

Шунингдек, коррупция билан боғлиқ ҳуқуқбузарликлар ва улар учун белгиланган жавобгарлик масалалари ҳамда ҳоким ёрдамчилари томонидан содир этилган коррупциявий ҳуқуқбузарликлар таҳлил қилинмоқда. Бу борада ҳоким ёрдамчилари фаолиятида коррупциявий омилларни вужудга келиш сабаблари ҳамда шарт-шароитлари, уларни бартараф этиш усулларига алоҳида урғу берилмоқда.

Аввалроқ Учтепада 30 дан ортиқ ҳоким ёрдамчиси ҳайфсан олгани, Ўзбекистондаги 18 та шаҳар ва туман ҳокими ўринбосарлари ишдан олингани, Тошкент шаҳри Ўзбекистонда энг коррупциялашган ҳудуд деб топилгани тўғрисида хабар берилганди.