Ижтимоий тармоқларда Сурхондарё вилояти Сариосиё туманида жойлашган Тўпаланг сув омбори тўғони ёрилиб кетгани ва натижада атрофни сув босгани ҳақидаги хабарлар тарқалди. «Дарё» «Ўзбекгидроэнерго» акциядорлик жамияти ахборот хизмати билан боғланиб, ҳолат юзасидан изоҳ олди.
Айтилишича, тўғоннинг ёрилиб кетгани ҳақидаги хабарлар мутлақо нотўғри.
«Ҳозирда у ерда жойлашган ГЭСда модернизация ишлари олиб борилмоқда. Шу боис у ерда синов тариқасида сув чиқарилиб, ГЭСнинг фаолияти текшириб кўрилмоқда», — дейди масъул ходим.
Фавқулодда вазиятлар вазирлиги Тўпаланг сув омборидаги ҳолат бўйича бирламчи маълумот берди.
«Ижтимоий тармоқларда Тўпаланг сув омборида сув чиқаётганлиги тўғрисида маълумотлар тарқалди. Ушбу ҳолат бўйича қуйидагиларни маълум қиламиз. Бугун, 22 июнь куни соат 08:14 ларда Тўпаланг сув омборидан чиқаётган сув кескин кўтарилган, Тўпаланг ГЭС сув омбори лойиҳаси қуввати 400 млн.м/куб, амалда 378,87 млн.м/кубни ташкил этмоқда. Сув ташламаси режавий 70 м.куб/сек. 2022 йил 22 июнь куни ҳозирги вақтда 110 м.куб/сек.ни ташкил этмоқда» — дейилади вазирлик ахборотида.
Вазирликнинг қўшимча қилишича, сув омборининг мустаҳкамлигига зиён етмаган, айни вақтда чиқарилаётган сув ҳажмини камайтириш ишлари олиб борилмоқда.
Маълумот учун, Тўпаланг сув омбори 1982 йилда қурила бошланган бўлиб, лойиҳа қуввати 500 миллион куб метр. Сув омбори тўғонининг баландлиги 165 метр, яна 22 метр ер остига пойдевор қилинган, умумий 187 метрни ташкил қилади.
Аввалроқ Намангандаги сув омбори тўғони остидан сув сизиб чиққани аниқланди.
Изоҳ (0)