Ижтимоий тармоқларда Фарғона вилоятида жаримани тўлашга имконияти бўлмаган ҳайдовчи ўзини ёқиб юборгани айтилган хабарлар тарқалди. Вилоят ИИБ ҳолатга муносабат билдириб, ҳайдовчига нисбатан жарима асосли равишда белгиланганини маълум қилди.
Интернетда «ГАИнинг айтишича, бир қизчага йўл бермагани учун шунча ваҳима. Ҳайдовчининг айтишича, ‘началник ГАИъни қувиб ўтгани учун шунча ваҳима» сарлавҳали видеохабар Фарғона вилояти ИИБ томонидан ўрганиб чиқилган.
Маълум бўлишича, 2022 йил 15 февраль куни Қува тумани ИИБ ЙҲХГ катта инспектори Х.Ш. ва ЙПХ катта инспектори М.А. туманнинг Ғалаба кўчасида Nexia-2 автомобиль ҳайдовчиси йўлнинг қатнов қисмини кесиб ўтаётган пиёда ҳамда бошқа транспорт воситаларининг ҳаракатига рахна солган ҳолатда ҳаракатланганини кўриб, унинг ортидан бориб тўхташ ишораси орқали тўхтатган.
Ҳайдовчи М.Т.га содир этган қоидабузарлигини тушунтириб, тегишли ҳужжатларини тақдим этишини сўралган вақтида, у ҳужжатларни тақдим этмасдан, ички ишлар органлари ходимларининг қонуний талабларини бажармаган. Шундан сўнг М.Т.га нисбатан йўл ҳаракати қоидаларини бузгани юзасидан электрон баённома расмийлаштирилиб, транспорт воситаси Қува туманидаги жарима майдончасига олиб кирилган.
Ҳайдовчи М.Т. жарима майдончаси олдида ички ишлар органларининг қонуний талабларини бажармасдан, уларнинг шаъни ва қадр-қимматини камситувчи ҳаракатларини содир этишда давом этгани учун профилактика инспекторлари томонидан Маъмурий жавобгарлик тўғрисидаги кодекснинг 183- (майда безорилик) ва 194-моддалари (ички ишлар органлари ходимининг қонуний талабларини бажармаслик) тартибида баённома расмийлаштирилган.
Бундан ташқари, видеохабарда айтилишича М.Т. гўёки йўл ҳаракати қоидасини бузганлик учун тайинланган жарима қийматини тўлашга имконияти бўлмаганидан аччиқланиб, ўз яшаш хонадонида устидан бензин қуйиб, ёқиб юбориб, ўз жонига суиқасд қилгани айтилган. Лекин алоқадор ходимларнинг хатти-ҳаракатлари юзасидан ўтказилган хизмат текшируви давомида Nexia-2 русумли автомобиль жарима майдонига асосли жойлаштирилгани, тузилган маъмурий баённомалар асосли эканлиги келтириб ўтилган.
Ўтказилган хизмат текшируви хулосасининг нусхаси ва тўпланган ҳужжатлар 2022 йил 10 март куни ҳуқуқий баҳо бериш учун Қува тумани прокуратурасига юборилган.
Аввалроқ Қаршида Nexia ойнасидан оёқларини чиқариб ҳаракатланган маст аёл жаримага тортилгани, Сирдарёда машина ойнасидан оёғини чиқариб ҳаракатланган ҳайдовчи жазолангани тўғрисида хабар берилганди.
Изоҳ (0)