«Ўзгидромет» май ойи сўнггида июнь ойида қандай об-ҳаво бўйича прогнозларини эълон қилганди. Гидрометеорология хизматининг маълум қилишича, прогнозлар ўзини оқлаган.
Қайд этилишича, хизмат марказининг жойлардаги кузатув станция маълумотларига кўра, мазкур ой бошидан 21 июнь кунига қадар Самарқанд ва Тошкент вилоятларида ёғингарчилик меъёрдан кўп кузатилган. Ой бошидан Тошкент шаҳрида ўртача ойлик ёғингарчиликнинг 130 фоизи кузатилган. Ўзбекистоннинг катта қисмида эса ёғингарчиликнинг умумий миқдори ўртача ойлик иқлимий кўрсаткичларидан кам бўлган.
19—20 июнь кунлари республика ҳудудларига Қора денгиз ва Кавказ ҳудудларидан ғарбий нам ҳаво массаларининг кириб келиши қайд этилган. Бу жараён кучли шамол ва айрим вилоятларда кучли ёғингарчиликлар бўлишига олиб келган. Кучли ёғингарчиликлар республиканинг жанубий ва шимоли-шарқий ҳудудларида кузатилган. Хусусан, Тошкент шаҳрида 20 июнь кундуз куни вақти-вақти билан кучли жадал ёғингарчилик кузатилган. Ёғингарчилик умумий миқдори пойтахтда нотекис тақсимланган.
Таъкидланишича, сутканинг 12 соат ичида 15 мм ва ундан кўп ёғингарчилик кузатилиши бу хавфли метеорологик ҳодиса ҳисобланади. Айниқса, ёз ойларида бу каби ёғингарчилик одатда интенсив (жадал) кўринишда ёғиши ҳисобига йўлсозлик ва қурилиш объектларида нотўғри ёндашув асосида барпо этилган объектлар (лоток, сув ўтказиш иншоотлари, дренаж, кучли ёғингарчиликка бардошли том ёпилмалари) сел-сув босиш ҳодисаларини келтириб чиқариши мумкин.
Ёз ойларида пойтахтда 12 соат ичида 15 мм дан кўп ёғингарчиликлар кузатилиши жуда камдан кам ҳолатларда рўй беради. Тошкент шаҳрида охирги ўн йилликда ёзнинг дастлабки июнь ойида биргина ҳолатда сутка давомида 15 мм дан кўп ёғингарчилик кузатилган. 2019 йилнинг июнь ойи бошларида (3- ва 6 июнь) Тошкентда икки кун ичида умумий 56 мм ёғингарчилик қайд этилган. Ёғингарчиликлар дўл ва кучли жадал ёмғир кўринишида ёғиб ўтган.
Изоҳ (0)