Германия ва Словакия томонидан сўнгги икки ой мобайнида режалаштириб келинган доиравий етказиб беришлар доирасида Украинага оғир қурол-яроғларни тақдим этиш Берлин ва Братислава ўртасида келишувлар йўқлиги учун кечикмоқда. Бу ҳақда Business Insider нашри хабар берди.
Унинг маълумотларига кўра, Словакия Киевга совет иттифоқида ишлаб чиқарилган 30 та Т-72 танкларини бериб, эвазига Германиядан замонавийроқ танклар олишга рози бўлган. Аммо ўтган ҳафта Берлин унга компенсация сифатида 15 та «Леопард-2А4» танкларини таклиф қилганидан кейин, Братислава айланма (доиравий, ўзаро) етказиб беришлардан бош тортди. Словакия ҳукумати фикрича, бу мамлакат мудофааси учун етарли эмас.
Апрель охирида Германия бундестаги кўпчилик овоз билан Украинага оғир қурол-яроғ етказиб берилишини маъқуллади. 586 та овоз билан қабул қилинган депутатлар қарорида Германия ҳукумати «Украинага унга зарур бўлган техникани етказишни давом эттириш ва имкони борича тезлаштириш, шу билан бирга, қурол-яроғларнинг оғир ва мураккаб тизимларини, масалан, доиравий етказиб бериш доирасида, кенгайтириш»га чақирилган.
Бунинг учун Германия Шарқий Европа мамлакатлари захираларидаги совет иттифоқида ишлаб чиқарилган оғир техника етказиб берилишини компенсация қилишга ваъда берди.
Украина ҳукумати Ғарб мамлакатларига қурол-яроғ етказиб беришни сўраб бир неча марта мурожаат қилган. Апрель охирида Украина президенти Владимир Зеленский шериклар Киевга ўзи сўраган қурол-яроғларни етказиб беришни бошлаганини маълум қилган, аммо гап айнан қандай қуроллар ҳақида бораётганига аниқлик киритмаган эди.
Аввалроқ АҚШ Мудофаа вазирлиги Украинага 108 та М777 гаубицаларини етказиб берганини маълум қилди. Шунингдек, АҚШ президенти Жо Байден Киевга 1 миллиард долларлик янги ҳарбий ёрдам пакети берилишини эълон қилди, у ерга артиллерия қуроллари ва ракета тизимлари кирди. Украинага оғир қурол-яроғ етказиб беришни апрель охирида Германия ваъда қилганди, бироқ ҳозирча бирорта ҳам қурол юборгани йўқ.
Украина президенти офиси раҳбарининг маслаҳатчиси Михаил Подоляк Россияга тенг келиш учун 1 мингта 155 миллиметрлик гаубица, 300 та баравар ўт очиш реактив тизими, 500 та танк ва 2 мингта зирҳли техника кераклигини айтди.
Украинанинг Австралиядаги элчиси Василий Мирошниченко таъкидлашича, Зеленский дипломатларга иложи борича кўпроқ қурол-яроғ, шу жумладан, гаубица ва зирҳли техника етказиб берилишига эришиш вазифасини юклаган.
Россия ТИВ Украинага Россия ҳудудига етиб бора оладиган қурол-яроғ етказиб берилиши «кескинлашув сари катта қадам» бўлишидан огоҳлантирган. Россиянинг Вашингтондаги элчиси Анатолий Антонов, ўз навбатида, Қўшма Штатлардан Украинани қурол-яроғ билан таъминлашни бас қилишни талаб қилган.
Зеленский эса Россия ҳудудига ҳужум қилиш эҳтимолини рад этди. Украина узоқ масофага мўлжалланган қуролларни Россиядаги нишонларга ҳужум қилиш мақсадида эмас, балки ўз мудофааси учун сўрамоқда, деди у.
Изоҳ (0)