Россия президентининг матбуот котиби Дмитрий Песков Жанубий Осетия ҳукумати референдум ўтказиш қароридан кейин юзага келган юридик чигалликни бартараф этиши зарур, деб ҳисоблайди. Таклиф этилган вариантда республика аҳолиси Россия Федерацияси билан бирлашишни қўллаб-қувватлаши ёки рад этиши керак эди. Кремль вакили сўзларига кўра, Россия «ким биландир бирлаша» олмайди. Унинг таъкидлашича, Россия томони аввал ҳам Жанубий Осетия ҳукуматига бу чигаллик ҳақида айтган.
«Россия ким биландир бирлаша олмайди-ку. Агар ким биландир бирлашса, бутунлай янги энтитет (тузилма) юзага келади. Юридик чигаллик пайдо бўлади. У ердаги ҳамкасбларимизнинг ўзлари аниқлаштириб, ҳал қилгани яхши», — деди Песков журналистларнинг Жанубий Осетия президенти баёнотини изоҳлаш ҳақидаги сўровига жавобан.
Аввалроқ Жанубий Осетия президенти маъмурияти Россияга қўшилиш ҳақидаги, собиқ президент Анатолий Бибилов ва амалдаги давлат раҳбари Алаб Гаглоев томонидан имзоланган референдум ҳақидаги фармон Москва билан келишилмаганини маълум қилганди. Референдумни июлда ўтказиш режалаштирилганди. Президент маъмуриятидагилар Россия президенти аппаратидаги ҳамкасблари билан суҳбатдан кейин ҳужжат Россия-Осетия ҳамкорлиги тўғрисидаги шартнома бандларига зид, деган хулосага келган. Референдум ўтказилиб, Россия таркибига кирган тақдирда, Жанубий Осетия Шимолий Осетия билан федерациянинг битта субъекти сифатида бирлашишни режалаштирганди.
Жанубий Осетия президенти Анатолий Бибилов ҳудуднинг Россияга қўшилиши ҳақидаги режалар ҳақида 30 март куни эълон қилганди. У Шимолий Осетия билан бир ҳудудга бирлашиш таклифини берган. Апрелда Жанубий Осетияда президентлик сайловлари ўтказилган ва 56,09 фоиз олган Алан Гаглоев ғалабага эришган. Гаглоев Россияга қўшилиш бўйича референдумни кечиктириш ҳақида гапирган. Бироқ Бибилов умумхалқ муҳокамасини 17 июлга кўчиришга қарор қилди. Кремль май ойи охирида референдумни ташкиллаштиришда иштирок этмаётганини маълум қилиб, ундаги саволларни қандай тузиш ҳақида ўйлаб кўришни таклиф этганди. Май охирида Гаглоев 2022 йил 17 июль куни Россия билан бирлашиш ҳақида референдум ўтказилишини кўзда тутувчи фармон амал қилишини Россия билан барча маслаҳатлашувлар якунлангунига қадар тўхтатиб қўйди.
Изоҳ (0)