Афғонистон жануби-шарқидаги Пактика вилоятида содир бўлган кучли зилзила оқибатида камида 250 киши ҳалок бўлди, 150 га яқин одам жароҳатланди. Бу ҳақда маҳаллий ҳокимият вакилларига таяниб, BBC хабар берди.
Ижтимоий тармоқларда вайрон бўлган уйлар, кўчалардаги вайроналар ва замбилда олиб кетилаётган қурбонлар акс этган кадрлар тарқалмоқда.
Маҳаллий ҳокимият вакилининг айтишича, табиий офат қурбонлари сони ортиши мумкин.
Зилзила эпицентри Афғонистон жануби-шарқидаги Хост шаҳридан 44 километр узоқликда жойлашган.
Ер силкинишлари мамлакат чегарасидан 500 километрдан ортиқ масофада, жумладан, Ўзбекистоннинг Сурхондарё, Қашқадарё, Самарқанд ва Жиззах вилоятларида, Покистон пойтахти Исломободда ва Ҳиндистонда сезилган.
«Пактика вилоятининг тўрт туманида кучли зилзила содир бўлди. Юзлаб аҳолисимиз ҳалок бўлди ва жароҳатланди, ўнлаб уйлар вайрон бўлди. Биз барча идораларни ҳудудга зудлик билан ёрдам юборишга чақирамиз», — деб ёзган маҳаллий ҳокимият вакили Билол Каримий Twitter’да.
Америкалик сейсмологларнинг маълумотларига кўра, Афғонистонда 6,1 магнитудали зилзила 22 июнь куни эрта тонгда, кўпчилик ҳали ухлаётган пайтда, 51 километр чуқурликда содир бўлган.
Изоҳ (0)