Фуқаролар ҳамда бизнес вакиллари қарор қабул қилувчилардан очиқ, шаффоф ва далилларга асосланган қонунчиликни талаб этмоқда. Бу ҳақда адлия вазири Русланбек Давлетов 21 июнь куни бўлиб ўтган Адлия вазирлиги, Европа тикланиш ва тараққиёт банки ҳамда АҚШ Халқаро тараққиёт агентлиги билан ҳамкорликда Ўзбекистонда тартибга солиш сиёсати юзасидан ўтказилган конференцияда маълум қилди.
Конференцияда Ўзбекистонда тартибга солиш сиёсати, шу жумладан, қонунчилик ҳужжатларини тартибга солиш таъсирини баҳолашдаги дастлабки натижалар ва истиқболдаги режалар муҳокама қилинди.
Русланбек Давлетовнинг айтишича, тартибга солиш сиёсати солиқ ва пул-кредит сиёсати билан бир қаторида мамлакатда иқтисодиётни бошқариш, барқарор ривожланишга эришиш учун қўлланадиган асосий восита сифатида тан олинган.
Адлия вазири тартибга солиш сиёсати ҳақида ҳам фикр билдирар экан, жумладан, шундай дейди: «Биз ҳуқуқшунослар ҳар бир ҳужжат қабул қилинишида уни нимага олиб келишини ўйлайлик. Оқибати қандай бўлади бизнес субъектларига нисбатан қандай оғирлик ёки енгиллик олиб келади? Қандай прогноз қиламиз? Қандай услубиётлар бор? Қабул қилинган қарорлар кичик оилага эмас, бутун халққа, бизнес субъектларга таъсир қилиб кетяпти. Жамият учун унинг хавфсизлиги ва соғлом турмуш тарзини ҳимоя қилувчи қоидалар албатта зарур, бироқ, уларнинг сифати ва самарадорлигини таъминлаб беролмасак, аксинча иқтисодий ривожланиш йўлида, яъни бизнес юритишда тўсиқлар яратилишига олиб келиши мумкин. Биз маъмурий юкни жуда қаттиқ назорат қилишимиз керак, чунки бизнес ҳуқуқий ҳужжатларни ичида бўкиб қолмаслик керак».
Русланбек Давлетов яқинда келган камералар ўрнатиш масаласини тартибга солиш бўйича бир ғоянинг оқибатларини ўргангани ҳақида ҳам фикр билдирди.
«Қандай камера? Қаерга ўрнатиш керак? Бунга қанча вақт ва маблағ кетади? Бу талабларни ижроси бизнес субъектларини қўлидан келадими йўқми каби саволлар ортидан катта комплекс масалалар чиқди ва шунинг натижасида хулоса қилдикки бу қарорни қабул қилмайдиган бўлдик. Бу биз қўйган мақсадга эришадиган механизм эмас экан» — дейди адлия вазири.
Давлетов ўз сўзида тадбиркорлик соҳасидаги, хусусан, техник қоидалар ҳақида гапириб, бир мисолни келтирди: «Яқинда биз умумий овқатланиш шохобчаларини таҳлил қилдик, бир томондан қаралганда тўғри енгилликлар берилган. Лекин улар фаолиятига раҳбарлик қиладиган ҳужжатларда ўзгариш йўқ, улар эски талаблар, бугунги замон талабларига жавоб бермайди. Масалан, санитария ва гигиена қоидалари эски тартибда турибди. Тадбиркор, бу эскича тартибни тушунмайди, билмайди, бажариши ҳам қийин. Бундан эса, текширувчи манфаатдор. Шунинг учун коррупцияга қўл уради», — деди адлия вазири.
Изоҳ (0)