Озарбайжон президенти Илҳом Алиевнинг Ўзбекистонга ташрифининг илк кунида икки мамлакат ҳукуматлари, вазирлик ва идоралари ўртасида 18 та ҳужжат имзоланди. Бу ҳақда «Дарё» мухбири хабар берди.
Дастлаб, Шавкат Мирзиёев ва Илҳом Алиев Ўзбекистон билан Озарбайжон ўртасидаги стратегик шерикликни чуқурлаштириш ва ҳар томонлама ҳамкорликни кенгайтириш тўғрисидаги декларацияни имзолади.
Шунингдек, Ўзбекистон ва Озарбайжон ҳукуматлари ўртасида икки томонлама ҳужжатлар имзоланди.- «Озарбайжон Меҳнат ва аҳолини ижтимоий муҳофаза қилиш вазирлиги билан Ўзбекистон Бандлик ва меҳнат муносабатлари вазирлиги ўртасидаги ўзаро англашув меморандуми»;
- «Озарбайжон Рақамли ривожланиш ва транспорт вазирлиги ва Ўзбекистон Инновацион ривожланиш вазирлиги ўртасидаги англашув меморандуми»;
- «Озарбайжон ва Ўзбекистон ҳукуматлари ўртасида ўсимликлар карантини ва ҳимояси соҳасида ҳамкорлик тўғрисида»ги битим;
- «Озарбайжон ва Ўзбекистон ҳукуматлари ўртасида саноат мулкини муҳофаза қилиш соҳасида ҳамкорлик тўғрисида»ги битим;
- «Озарбайжон ва Ўзбекистон ҳукуматлари ўртасида халқаро автомобиль қатнови тўғрисида»ги битим;
- «Озарбайжон ва Ўзбекистон ҳукуматлари ўртасида ҳарбий соҳадаги ҳамкорлик тўғрисида»ги битим;
- Озарбайжон ва Ўзбекистон Ташқи ишлар вазирлиги ўртасида 2022—2024 йилларга мўлжалланган ҳамкорлик дастури;
- «Саноат соҳасида ҳамкорлик тўғрисида»ги битим;
- «Минтақалараро ҳамкорлик тўғрисида»ги битим.
Илҳом Алиев ташрифининг биринчи куни
Шавкат Мирзиёев таклифига биноан Озарбайжон президенти Илҳом Алиев 21 июнь куни давлат ташрифи билан Ўзбекистонга келди. Озарбайжон президентининг Ўзбекистонга ташрифи Ҳайдар Алиев шарафига номланган кўча ва унинг ёдгорлиги очилишидан бошланди. Шундан сўнг Озарбайжон президенти Шавкат Мирзиёев ҳамроҳлигида «Янги Ўзбекистон» боғига ташриф буюриб, Мустақиллик монументи пойига гул қўйди.Кейинроқ Кўксаройда Илҳом Алиевни расмий кутиб олиш маросими бўлиб ўтди. Маросимда Ўзбекистон ва Озарбайжон расмий делегациялари аъзолари иштирок этди. Аввал тор доирада, сўнг кенгайтирилган тартибда музокаралар ўтказилди. Давлат раҳбарлари стратегик шерикликни чуқурлаштириш ва ҳар томонлама ҳамкорликни кенгайтириш тўғрисидаги декларацияни имзолади. Шундан сўнг ОАВ учун брифинг ўтказилди.
Ташриф Ўзбекистон ва Озарбайжон президентларининг Тошкентдаги Технопаркни бориб кўриши, Фахрий меҳмонлар хиёбонига кўчат экиши билан давом этди.
Изоҳ (0)