Fuqarolar hamda biznes vakillari qaror qabul qiluvchilardan ochiq, shaffof va dalillarga asoslangan qonunchilikni talab etmoqda. Bu haqda adliya vaziri Ruslanbek Davletov 21-iyun kuni bo‘lib o‘tgan Adliya vazirligi, Yevropa tiklanish va taraqqiyot banki hamda AQSH Xalqaro taraqqiyot agentligi bilan hamkorlikda O‘zbekistonda tartibga solish siyosati yuzasidan o‘tkazilgan konferensiyada ma’lum qildi.
Konferensiyada O‘zbekistonda tartibga solish siyosati, shu jumladan, qonunchilik hujjatlarini tartibga solish ta’sirini baholashdagi dastlabki natijalar va istiqboldagi rejalar muhokama qilindi.
Ruslanbek Davletovning aytishicha, tartibga solish siyosati soliq va pul-kredit siyosati bilan bir qatorida mamlakatda iqtisodiyotni boshqarish, barqaror rivojlanishga erishish uchun qo‘llanadigan asosiy vosita sifatida tan olingan.
Adliya vaziri tartibga solish siyosati haqida ham fikr bildirar ekan, jumladan, shunday deydi: “Biz huquqshunoslar har bir hujjat qabul qilinishida uni nimaga olib kelishini o‘ylaylik. Oqibati qanday bo‘ladi biznes subyektlariga nisbatan qanday og‘irlik yoki yengillik olib keladi? Qanday prognoz qilamiz? Qanday uslubiyotlar bor? Qabul qilingan qarorlar kichik oilaga emas, butun xalqqa, biznes subyektlarga ta’sir qilib ketyapti. Jamiyat uchun uning xavfsizligi va sog‘lom turmush tarzini himoya qiluvchi qoidalar albatta zarur, biroq, ularning sifati va samaradorligini ta’minlab berolmasak, aksincha iqtisodiy rivojlanish yo‘lida, ya’ni biznes yuritishda to‘siqlar yaratilishiga olib kelishi mumkin. Biz ma’muriy yukni juda qattiq nazorat qilishimiz kerak, chunki biznes huquqiy hujjatlarni ichida bo‘kib qolmaslik kerak”.
Ruslanbek Davletov yaqinda kelgan kameralar o‘rnatish masalasini tartibga solish bo‘yicha bir g‘oyaning oqibatlarini o‘rgangani haqida ham fikr bildirdi.
“Qanday kamera? Qayerga o‘rnatish kerak? Bunga qancha vaqt va mablag‘ ketadi? Bu talablarni ijrosi biznes subyektlarini qo‘lidan keladimi yo‘qmi kabi savollar ortidan katta kompleks masalalar chiqdi va shuning natijasida xulosa qildikki bu qarorni qabul qilmaydigan bo‘ldik. Bu biz qo‘ygan maqsadga erishadigan mexanizm emas ekan” — deydi adliya vaziri.
Davletov o‘z so‘zida tadbirkorlik sohasidagi, xususan, texnik qoidalar haqida gapirib, bir misolni keltirdi: “Yaqinda biz umumiy ovqatlanish shoxobchalarini tahlil qildik, bir tomondan qaralganda to‘g‘ri yengilliklar berilgan. Lekin ular faoliyatiga rahbarlik qiladigan hujjatlarda o‘zgarish yo‘q, ular eski talablar, bugungi zamon talablariga javob bermaydi. Masalan, sanitariya va gigiyena qoidalari eski tartibda turibdi. Tadbirkor, bu eskicha tartibni tushunmaydi, bilmaydi, bajarishi ham qiyin. Bundan esa, tekshiruvchi manfaatdor. Shuning uchun korrupsiyaga qo‘l uradi”, — dedi adliya vaziri.
Izoh (0)