Ижтимоий тармоқларда Сурхондарё вилояти Сариосиё туманида жойлашган Тўпаланг сув омбори тўғони ёрилиб кетгани ва натижада атрофни сув босгани ҳақида хабарлар тарқалганди. Вилоят ҳокими Тўра Боболов сув омборидаги ҳолат юзасидан аҳолига мурожаат билан чиқди.
Сурхондарё вилояти ҳокими Тўра Боболов Сариосиё туманидаги Тўпаланг сув омборида бўлиб, ҳақиқий ҳолатга изоҳ бериб, ваҳимага ўрин йўқлигини таъкидлаган.
«Бугун эрталаб соат 08:14 да Сариосиё тумани Тўпаланг сув омборининг ‘Тўпаланғ ГЭС қисмида сув тошқини ҳолати юз берган. Сув омбори тўғонига ҳеч қандай талафот, шикаст етмаган. Ҳозирда сув сизиб чиқиши тўхтатилган. ‘Тўпаланғ ГЭСнинг ички қисмида юзага келган кичик носозлик бугуннинг ўзида бартараф этилади. ‘Зарчоб-1’ ва ‘Зарчоб-2’ ГЭС эса маромда ишлаб турибди.
Ҳудудда тегишли комиссия иш олиб бормоқда. Фуқароларимиздан тушкунликка тушмасликни, саросимага берилмасликни сўраймиз. Ҳеч қандай ваҳимага ўрин йўқ», — дейди вилоят ҳокими.
Аввалроқ Фавқулодда вазиятлар вазирлиги сув омборининг мустаҳкамлигига зиён етмагани, айни вақтда чиқарилаётган сув ҳажмини камайтириш ишлари олиб борилаётганини маълум қилганди. «Ўзбекгидроэнерго» модернизация лойиҳаси доирасида синов ишлари олиб борилаётган босимли сув қувури тўсини шикастланиб, қўшимча 40 метр куб/сония атрофида сув миқдори ГЭС биноси орқали чиққанини билдирган.
Маълумот учун, Тўпаланг сув омбори 1982 йилда қурила бошланган бўлиб, лойиҳа қуввати 500 миллион куб метр. Сув омбори тўғонининг баландлиги 165 метр, яна 22 метр ер остига пойдевор қилинган, умумий 187 метрни ташкил қилади.
Изоҳ (0)