Самарқанд вилояти, Ургут туманидаги «Гулобод» ва «Қайроқли» маҳаллаларида йиллар давомида ҳал этилмай келаётган йўл муаммоси мавжуд. Мазкур маҳаллаларда яшовчи аҳолидан маҳаллани туман маркази ҳамда шаҳар билан боғловчи ички йўлларнинг таъмирталаблиги, йилнинг қиш ва баҳор ойларида транспорт қатновида муаммолар бўлаётганлиги ҳақида мутасадди ташкилотларга кўплаб мурожаатлар тушган. Энг ачинарлиси, фуқаролар томонидан туман ҳокимлигига бир неча бор мурожаат қилинган бўлса-да, муаммо шу вақтгача ҳал этилмаяпти.
«Дарё» мухбири Фарҳод Норбўтаев аҳоли билан учрашиб, уларни қийнаётган йўл муаммоси ҳақидаги фикрларини эшитди.
«Бу кўчалардан юриб бўлмайди, аҳволини кўряпсизлар. Икки-уч йилдан буён аҳвол шу. Мурожаат қиляпмиз. Аммо натижа йўқ. Туман марказидан бор-йўғи 3 километр узоқликдаги йўлдан ёмғир кунлари юриб бўлмайди», — дейди Сами Муҳаммадиёров.
Шу маҳаллада яшовчи Муҳиддин Қобиловнинг айтишича, туман марказидан кириб келувчи Ислом Каримов кўчаси ҳам кавлаб ташланган. Йўлни ямаш учун кавлаб ташланган чуқурлар тўлдирилмаган. 2019 йилдан бери йўлларда ҳеч қандай ўзгариш йўқ.
Йиллар давомида мурожаати ҳал бўлмаётган фуқароларнинг ҳокимиятга бўлган ишончи йўқолган. Маҳалла аҳли ҳашар қилиб йўлга тош тўккан. Аҳолининг айтишича, уларнинг қилаётган ишларини кимдир расмга олиб, қаергадир мақтанган.
«Йўлларимиз тухум коробкасига ўхшаб қолган. Ҳоким вакиллари ҳар доим келиб, қоп-қоп ваъдани бериб кетишади, аммо натижа йўқ. Ургут туман ҳокими келиб, бизга 15 кун ичида асфальт қилишга ҳаракат қиламиз, деб айтиб кетган эди. У ваъдани берганига ҳам икки ой бўляпти. Икки йил олдин ўзимиз ташаббус кўрсатиб, ҳашар йўли билан 150 машина тош тўккан эдик. Келиб бизларнинг ишимизни расмга олиб кетишди. Қаергадир уни кўрсатиб, мақтанган бўлиши мумкин, бизлар буни билмаймиз. Лекин натижа йўқ. Келади, халқни алдаб ваъдани беради. Яна аҳвол шу. Президентимиз ҳам ‘Обод маҳалла’ ҳақида гапиряпти. Ҳамма жойда ўзгариш бўляпти. Бизда ҳеч натижа бўлмаяпти», — дейди Шерзод Ҳалилов.
Фуқароларнинг айтишича, йўлларни таъмирлаш 2022 йилги дастурга киритилган. Хўш, йилнинг ярми ҳам ўтиб бораётган бўлса, бу йўллар қачон таъмирланади?
«Менга 2022 йилда дастурга қўйилган, деган гапни айтди. Аммо мен тумандагиларга ишонмасдан, вилоятга чиққан эдим, улар ҳақиқатан дастурга кирганлигини исботловчи ҳужжатни беришди. Келиб, мактаб йўли ва ички йўлни ўлчаб, дастурга кирган, деб кетишди. Давлат дастури бўлганидан кейин пулни ажратиш керак. Лойиҳа билан қилиш керак. Халқнинг эътирози — йўлни қилиб бермаганлигида», — дейди Шарофбой Аҳмедов.
«Бу масала бўйича туман ҳокимига мурожаат қилдик. Лекин ҳеч қандай ўзгариш йўқ. 2022 йилнинг 7 апрель куни сайёр қабулга кириб, туман ҳокими Ботир Жабборов билан суҳбатлашдим. Туман ҳокими бизнинг йўлимиз ҳали лойиҳада йўқ, деди. Мен бундан хафа бўлдим. Ҳоким кўчага тош тўкиб беришни ваъда қилди, лекин асфальт қилиб беролмайман, деди. Аммо ҳали ҳам жавоб йўқ. Бизда иккита мактаб бор: бошланғич синф ва катталар. Мурғак болалар мактабга боргунча устлари шалаббо бўлиб боришади», — дейди Дилором Жолматова.
Биз билан суҳбатда бўлган Ургут туман ҳокимининг қурилиш масалалари бўйича ўринбосари Шоҳрух Алиқуловнинг таъкидлашича, «Гулобод» ва «Қайроқли» маҳаллаларидан ўтувчи 2 километр йўл йил охиригача жорий таъмирланади.
«‘Гулобод’ ва ‘Қайроқли’ маҳаллалари ҳудудидан ўтган йўлнинг 2 километр қисми туман йўллардан фойдаланиш унитар корхонаси томонидан тўлиқ йил якунига қадар жорий таъмирланиб, фойдаланишга топширилади. Ислом Каримов кўчаси жорий таъмирга тушиб, автойўл томонидан таъмирланмоқда. Бугунги кунда биринчи чорак якуни ва иккинчи чоракнинг икки ойида 22 та оғир маҳалла ҳудудларининг қарийб 160 километрга яқин лой кўчалари тош кўчага айлантирилди. Туманимизда 2021 йилда қарийб 110 километрга яқин йўллар асфальт қилиниб, 180 километрдан ортиқ лой кўчаларга тошлар ташланган», — дейди туман ҳокимининг қурилиш масалалари бўйича ўринбосари Шоҳрух Алиқулов.
Туман аҳли «Йўлларимиз қачон йўлга ўхшайди, бизда ҳам қачон ободончилиг-у ўзгаришлар бўлади?» дейишмоқда. Туман ҳокими ўринбосари Шоҳрух Алиқуловнинг таъкидлашича, Ургут тумани «Ўрамас» маҳалласида туман автомобиль йўлларига қарашли янги асфальт ишлаб чиқарувчи завод қурилган. Унинг тўлиқ ишга туширилиши тез орада йўл муаммосини бартараф этади.
Йиллар мобайнида аҳоли мурожаати нега эътиборсиз қолиб келмоқда? Наҳотки бу йўллар шу вақт давомида бирор маротаба ҳам давлат дастурига киритилмаган бўлса?! Агар киритилган бўлса, унда нега ҳеч қандай иш қилинмаган?! Қачондир бунга кимдир жавоб берадими ёки ёпиғлиқ қозон ёпиғлиқ ҳолида қолиб кетаверадими?
Изоҳ (0)