Бугун,

  • USD 11014.01
  • RUB 191.8
  • EUR 10674.78

Финляндия Туркиянинг позицияси туфайли сентябрдан олдин НАТОга аъзо бўлмаслиги мумкин, деди Финляндия президенти Саули Ниинистё НАТО штаб-квартирасида Туркия ва Швеция билан бўлиб ўтган уч томонлама учрашувдан сўнг.

Фото: Shutterstock

Фото: Shutterstock

«Аслида, (учрашувда) сезиларли силжиш бўлмади, лекин биз музокаралар бошланганидан мамнунмиз», — деди президент Европарламент раҳбари Роберта Мецола билан матбуот анжумани чоғида. У мамлакатлар охир-оқибат келишувга эришишига умид билдирди.

Ниинистёга Финляндия сентябргача НАТОга аъзо бўлиши мумкинми, деган савол ҳам берилди. «Мен аниқ саналарни айтишни истамаган бўлардим. Бундай эҳтимол бор, аммо бу эҳтимол сентябргача амалга ошмаслиги ҳам мумкин», — деб жавоб берди у.

Ниинистёнинг айтишича, музокаралар давом этмоқда.

Брюсселда Финляндия делегациясига раҳбарлик қилган Петри Хаккарайненнинг таъкидлашича, томонлар баъзи масалалар бўйича «аниқ силжиш»га эришган, бироқ бошқа масалалар бўйича келишувга эришиш учун вақт керак бўлади.

Туркия президентининг вакили Иброҳим Калин, ўз навбатида, музокаралар «очиқ ва самимий» муҳитда ўтганини айтди. Финляндия ва Швециянинг НАТОга аъзо бўлиш борасидаги ҳар қандай муваффақияти «бу давлатларнинг кейинги қадамлари қандай йўналиш ва тезлик билан ташланишига» боғлиқ бўлади, деди у.

«Ушбу қадамларни кўрганимизда, барчамиз бу жараённинг йўналишини баҳолаш имкониятига эга бўламиз», — деб қўшимча қилди Калйн.

Финляндия ва Швеция май ойи ўрталарида НАТОга аъзо бўлиш учун ариза топширган эди. Процедурага кўра, уларнинг НАТОга қўшилиши учун альянснинг барча аъзоларидан розилик талаб қилинади, бироқ Туркия бунга қарши чиқди. У икки мамлакатдан Туркияда террорчи ташкилот деб ҳисобланган Курдистон ишчилар партияси аъзоларини Анқарага топширишни, партияга алоқадор барча ташкилотларни ёпишни, шунингдек, бу ҳақда Анқарага тегишли кафолатлар беришни талаб қилмоқда.

Финляндия, Швеция ва Туркия вакиллари аллақачон музокаралар ўтказган, бироқ улардан сўнг Анқара натижалардан қониқмаганини маълум қилган.

Финляндиянинг СТТ агентлиги Финляндия терроризмда гумон қилинган шахсларни Туркияга экстрадиция қилишдан бош тортгани ҳақида хабар берди. Июнь ойининг бошига келиб, Хелсинки Туркия томонидан 2019 йилдан бери юборилган ўнта сўровдан еттитаси бўйича қарор чиқарди. Икки турк экстрадиция қилинган, бироқ улар ўз ватанларида террорчиликда гумон қилинмаган.

Изоҳ
Асосий янгиликлар