Қашқадарё вилоятининг Ғузор тумани ҳудудида жойлашган GTL заводида авария юз бергани, бир киши вафот этиб, икки киши куйиш тан жароҳатини олгани айтилмоқда. Бу ҳақда «Дарё»га шу завод ишчиларидан бири хабар берди.
«Дарё» мухбири билан суҳбатлашган косонлик Шавкат Нормуродов ўғли шу заводда ишлашини, заводдаги авария сабаб ўғлининг қўли ва юзи куйганини айтмоқда.
«Жуда ваҳимали жойи йўқ. Шунчаки қўли ва юзи озгина, тўғрироғи 7 фоиз куйган», — дейди Шавкат Нормуродов.
Суҳбатдошнинг айтишича, унинг ўғли Абдулазиз Яхшибоев GTL заводида анчадан бери фаолият юритади. Юзи ва қўли куйган ўғли ҳозирда Қарши шаҳридаги Темир йўл шифохонасида даволанмоқда.
Қашқадарё вилоят Фавқулодда вазиятлар бошқармаси ахборот хизмати раҳбари Соҳиб Ваитов заводда катта ёнғин содир бўлгани аниқ эмаслигини айтиб, бу ҳақда уларда маълумот йўқлигини билдирмоқда.
«Бизга бу ҳақида хабар берилмаган, чақирув бўлмаган. Аммо заводдаги қутқарув бўлинмамиз ходимлари воқеани завод ходимларидан эшитиб, воқеа жойига етиб борган. Ходимларимиз воқеа жойига борганида ҳеч қандай портлаш содир бўлганини кўрмаган. Фақат герметик ёрилиб, буғ чиқиш ҳолатини кўрган. Жароҳат олганлар ёки вафот этганлар ҳақида бизга маълум эмас», — дейди Соҳиб Ваитов.
Масъулнинг маълумот беришича, бошқарма бошлиғи ўринбосари воқеа ҳақида гап тарқалгач, заводга борган.
«Биз бориб ўргангунга қадар воқеа яширилган бўлмаса, биз билан ҳолат фақат буғ чиқиши билан боғлиқ жараён экан. Бизга маълуми ҳозирча шу», — дейди бошқарма ахборот хизмати раҳбари.
«Ўзбекнефтгаз» АЖ ахборот хизмати заводда авария содир бўлгани, бир нафар ишчи вафот этиб, икки нафар ишчи куйиш тан жароҳати олганини рад этмоқда.
Масъулларга кўра, авария содир бўлгани айтилган кун — 18 июнь соат 20:30 да заводнинг ҳаво ажратиш қурилмаси (10-сонли қурилма)ни ишга туширишга тайёрлаш жараёни бўлиб ўтган.
«Қурилманинг суюқ кислород сақлаш тизимидаги қувурида ўрнатилган бошқариш клапанининг уланиш қисмида юқори тозаликдаги кислород (99,99 фоиз) сизиб чиққан ва бу вақтда юзага келиши мумкин бўлган эҳтимолий авария ҳолатининг олдини олиш мақсадида барча зарур чоралар кўрилиб заводнинг ёнғин ўчириш, биринчи тез тиббий ёрдам хизматлари шай ҳолатга келтирилган.
Бу табиий ҳолат бўлиб, янги қуриб битказилган қурилмаларнинг иш бошлаш жараёнида сизиб чиқиш ҳолати кузатилиши мумкин. Шу сабаб, GTL заводида айни кунларда тўлиқ 24 соатлик иш режими ташкил қилинган бўлиб, навбатчилик ва вахта режимида ишчилар-ходимлар жумладан смена муҳандислари, масъул смена бошлиқлари фаолият олиб боришмоқда», — дейилади «Ўзбекнефтгаз» АЖ ахборот хизмати расмий маълумотида.
Изоҳ (0)