Сентябрь ойида Беларусь президенти Александр Лукашенко Ўзбекистонга ташриф буюриб, Шанхай ҳамкорлик ташкилоти (ШҲТ) саммитида иштирок этишни режалаштирмоқда. Бу ҳақда Беларусь бош вазири Роман Головченкога таяниб, Спутник хабар берди.
Шунингдек, Тошкентда Беларусь президенти Ўзбекистон раҳбари Шавкат Мирзиёев билан ҳам икки томонлама учрашув ўтказади.
Шанхай ҳамкорлик ташкилотининг Самарқанд саммити 2022 йил 15—16 сентябрь кунлари бўлиб ўтади. Аввалроқ Россия президенти Владимир Путин ҳам ташкилотнинг Самарқандда ўтказиладиган саммитида иштирок этиши маълум қилинганди.
Маълумот учун, Шанхай ҳамкорлик ташкилотининг Самарқанд саммити Эрон 2021 йил сентябрида ташкилотга тўлақонли иштирокчи сифатида қўшилганидан бери биринчиси бўлади. ШҲТга аъзо давлатлар: Ўзбекистон, Хитой, Россия, Қозоғистон, Қирғизистон, Тожикистон, Покистон, Ҳиндистон ва Эрон. Афғонистон, Мўғулистон ва Беларусь ташкилотда кузатувчи, Туркия эса мулоқот бўйича ҳамкор сифатида иштирок этади.
Саммитда ташкилотга аъзо кўплаб давлатлар билан умумий чегарага эга Афғонистондаги вазият ҳар томонлама муҳокама қилинади ва муҳим қарорлар қабул қилиниши кутилмоқда.
Изоҳ (0)