Тошкентда Озарбайжон президентининг Ўзбекистонга ташрифи арафасида Инвестициялар ва ташқи савдо вазирлиги ва Савдо-саноат палатаси томонидан Озарбайжон Иқтисодиёт вазирлиги ҳамда Экспорт ва инвестицияларни рағбатлантириш агентлиги билан ҳамкорликда ташкил қилинган Ўзбекистон-Озарбайжон бизнес-форуми бўлиб ўтди.
Инвестициялар ва ташқи савдо вазирлиги матбуот хизматининг хабар беришича, тадбирда вазирлик ва идоралар, тармоқ бирлашмалари раҳбарлари ҳамда Озарбайжон ва Ўзбекистоннинг йирик компанияларининг 100 дан ортиқ вакиллари иштирок этди.
Инвестициялар, саноат ва савдо соҳасида эришилган ютуқларни таъкидлаб, икки мамлакат иқтисодиётларининг ишга солинмаган салоҳияти ҳамда нефть-кимё, кимё, электротехника, тўқимачилик, озиқ-овқат, фармацевтика, заргарлик, автомобилсозлик ва бошқа соҳаларда ўзаро манфаатли ҳамкорликни янада ривожлантириш учун мавжуд шарт-шароитлар қайд этилди.
Икки мамлакат ўртасидаги иқтисодий ҳамкорликнинг изчил диверсификация қилиниши ўзбек ва озарбайжон ишлаб чиқарувчиларига янги қиймат занжирларини яратиш ва биргаликда учинчи мамлакатлар бозорларига чиқиш имконини бериши таъкидланди.
Шунингдек, икки мамлакат ҳудудлари орқали ўзаро ва транзит юк ташишни кўпайтиришни рағбатлантириш бўйича аниқ чора-тадбирлар жорий қилиниши эълон қилинди Бу, ўз навбатида, транспорт ва логистика соҳасида Ўзбекистон-Озарбайжон ҳамкорлигини чуқурлаштиради.
Учрашув якунлари бўйича умумий қиймати 500 миллион доллардан ортиқ қўшма лойиҳалар ва савдо шартномаларини амалга ошириш бўйича қатор битимлар, шунингдек, икки мамлакатнинг тегишли вазирлик ва идоралари ўртасида амалий ҳамкорлик тўғрисида 10 та келишув имзоланди.
Эслатиб ўтамиз, Шавкат Мирзиёевнинг таклифига биноан Озарбайжон президенти Илҳом Алиев 21—22 июнь кунлари давлат ташрифи билан Ўзбекистонда бўлади. Саммит кун тартибидан Ўзбекистон—Озарбайжон стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари ўрин олган.
Изоҳ (0)