Россия президентининг матбуот котиби Дмитрий Песков Коллектив хавфсизлик шартномаси ташкилоти кучларини Украинадаги жанговар ҳаракатларга жалб қилиш имконияти масаласи кўриб чиқилмаганини маълум қилди, деб ёзади «РИА Новости».
«Йўқ, бундай вариант кўриб чиқилгани йўқ», — деди Песков журналистларнинг Кремль томонидан Россиянинг Украинадаги урушига КХШТ кучларини жалб қилиш варианти кўриб чиқилган-чиқилмагани ҳақидаги саволига жавобан.
Шу билан бирга, Песков ташкилотнинг катта аҳамиятга эга эканини таъкидлади. «КХШТ мутлақо яқин ўтмишда ўз самарадорлигини, тезкорлигини ва зарурлигини намойиш қилганди. КХШТни ривожлантириш бизнинг ташқи сиёсат соҳасидаги бирламчи вазифаларимиздан бири ҳисобланади», — деди у.
Ҳозирги пайтда КХШТ таркибига олтита давлат — Арманистон, Беларусь, Қозоғистон, Қирғизистон, Россия ва Тожикистон киради.
Эслатиб ўтамиз, Қозоғистонда январдаги тартибсизликлар фонида президент Тўқаевнинг сўровидан кейин мамлакатга КХШТ ҳарбийлари юборилган эди.
Май ойида Тожикистоннинг Тоғли Бадахшон мухтор вилоятида тартибсизликлар авж олганидан кейин, Қирғизистон Миллий хавфсизлик давлат қўмитаси раиси собиқ ўринбосари, хавфсизлик бўйича эксперт Артур Медетбеков мамлакат ҳудудидаги вазиятни тартибга солиш учун КХШТ ҳарбий контингенти киритилиши мумкинлигини айтганди.
Изоҳ (0)