Тожикистон ҳукумати Тоғли Бадахшонда террорчилик гуруҳлари фаолиятига нуқта қўйилганини маълум қилди

Тожикистоннинг Тоғли Бадахшон мухтор вилоятида (ТБМВ) уюшган террорчилик гуруҳлари фаолияти тўлиқ тўхтатилди. Бу ҳақда Тожикистоннинг «Ховар» ахборот агентлиги хавфсизлик ва жамоат тартибини таъминлаш бўйича идоралараро штабга таяниб хабар берди, деб ёзади «Gazeta.uz».

Эслатиб ўтамиз, 14 май куни ТБМВда аҳоли норозилик акциясига чиқиб, вилоят раҳбарининг истеъфосини, Хоруғдаги барча блокпостлар очилишини ва Бадахшон фуқароларини таъқиб қилиш тўхтатилишини талаб қилган эди. Норозилик намойишлари фаол Амриддин Аловатшоев ва MMA жангчиси Чоршанбе Чоршанбиевга нисбатан суд ҳукмларидан кейин бошланган эди.

«Май охирида Хоруғ шаҳрида ва Рўшон туманида бўлиб ўтган воқеалар аввалдан режалаштирилган, ҳам ичкаридан, ҳам ташқаридан манфаатдор бўлган томонлар вилоятда хавфсизлик соҳасидаги вазиятни беқарорлаштирмоқчи ва фуқаролар тинчлигини бузмоқчи бўлган», — дейилади штаб хабарида.

«Хоруғ, Рўшон ва Роштқала туманлари уюшган жиноий гуруҳи бошлиқлари ўта оғир жиноятлар содир этганлик учун ҳукм қилинганидан кейин ҳукумат томонидан бир неча марта афв этилган, аммо зарур хулосалар чиқармасдан, ўз жирканч ҳаракатларини давом эттирган», — дейилади хабарда.

«Ховар» маълумотларига кўра, тезкор-қидирув тадбирлари чоғида уюшган жиноий гуруҳнинг барча 12 нафар бошлиқлари қўлга олинган. Махсус операциялар натижасида жами 220 киши ҳибсга олинган, 53 кишига нисбатан жиноят иши қўзғатилган, қуролли қаршилик кўрсатган 16 киши «зарарсизлантирилган», деб хабар беради штаб.

Май ойида БМТнинг озчиликлар масалалари бўйича махсус маърузачиси Фернан де Варенн Тожикистонни ТБМВда Помир озчиликлари вакилларига қарши репрессияларни тўхтатишга чақирганди. У ҳукуматнинг норозиликларга қаттиққўллик билан жавоб кўрсатиши, шу жумладан, 18 май куни аксилтеррорчилик операцияси доирасида намойишалрни бостириш учун ўта қаттиқ ва ноқонуний куч ишлатиш, ҳибсга олиш ва ҳарбийларни жалб қилиши юзасидан хавотир билдирганди.

ТБМВда кескин вазият ўтган йил ноябрида юзага келган, ўшанда помирликнинг хавфсизлик хизмати томонидан ўлдирилиши кенг кўламли норозиликларни келтириб чиқарган эди.

2021 йил 25 ноябрь куни ёш помирлик Гулбиддин Зиёбеков, тахминларга кўра, Тожикистон хавфсизлик кучлари томонидан қийноққа солинган ва ўлдирилган. Шу куниёқ одамлар ТБМВнинг пойтахти Хоруғда ушбу қотилликдан норози бўлиб марш уюштирган эди. БМТ янгиликлар хизмати келтириб ўтган хабарларга кўра, ҳукумат қўшинлари намойишни ўққа тутган, оқибатда икки киши ҳалок бўлиб, 17 киши яраланган, ўнлаб одамлар қамалиб кетган.