Евроиттифоқ Кенгашининг Люксембургдаги йиғилиши иштирокчиларининг барчаси Украинага иттифоққа қўшилиш учун номзод мақомини расман тақдим этиш қарорини қўллаб-қувватлади. Бу ҳақда Bloomberg ўз манбаларига таяниб хабар берди.
Агентлик маълумотларига кўра, ушбу қадам шу ҳафтадаёқ, 23—24 июнь кунлари бўлиб ўтадиган мамлакатлар етакчилари саммитида амалга оширилади. Бундан ташқари, мамлакатлар Молдовага ҳамда Грузияга ҳам номзод мақомини беришга тайёр, аммо улар қўшимча шартларни бажариши керак.
Bloomberg манбалари хабар беришича, Венгрия бош вазири Виктор Орбан Босния ва Герцеговинага номзод мақомини беришни сўраган, аммо Евроиттифоқнинг бошқа аъзолари таклифни «муаммоли» деб ҳисоблаган.
17 июнь куни Еврокомиссия Украинага Евроиттифоққа аъзолик номзодини тақдим этишни тавсия қилди. Еврокомиссия раҳбари Урсула фон дер Ляйен мамлакат «Европа қадриятлари ва стандартларига муносиб бўлишга интилиш ва қатъиятини аниқ-равшан намойиш этганини» айтди. Комиссия раиси қайд этишича, Киев олигархларга қарши қатъий қонунлар қабул қилган ҳамда Евроиттифоқнинг озчиликларга нисбатан ислоҳотлар бўйича тавсияларининг 70 фоизини бажарган.
Украина президенти Владимир Зеленский Еврокомиссияга тавсия учун миннатдорлик билдирди ва бу Киевни «ғалаба»га яқинлаштирувчи, «Евроиттифоққа аъзолик йўлидаги биринчи қадам» эканини айтди.
Еврокомиссия хулосасига кўра, Украина олий даражада коррупция билан ҳамда олигархлар билан курашишни кучайтиришда, шунингдек, озчиликларга нисбатан қонунчиликларни ислоҳ қилишда давом этиши керак бўлади. Бундан ташқари, Киев Конституциявий суд судьяларини танлаб олиш жараёни ҳақида қонунлар қабул қилиши ва Судьялар олий малака комиссияси тузиш учун номзодлар танлаб олишни якунлаши керак. Ушбу талаблар бажарилмаса, номзод мақоми қайтариб олиниши мумкин.
Украина Евроиттифоққа қўшилиш учун аризани Россия ҳарбий операцияси бошланганидан кейин берган эди. Украина масаласи бўйича якуний қарор 23—24 июнь кунлари Брюсселдаги саммитда қабул қилинади, барча — 27 та аъзо давлат ижобий жавоб бериши керак.
Мавзуга доир:
Изоҳ (0)