Россия Украинада асирга тушган америкаликлар ўлим жазосига ҳукм қилинмаслигига кафил бўла олмайди. Бу ҳақда Россия президенти матбуот котиби Дмитрий Песков MSNBC телеканалига берган интервьюсида айтиб ўтди, деб ёзади «РБК».
Журналистнинг америкаликларни аввалроқ Донецк Халқ Республикаси суди томонидан ўлимга ҳукм қилинган британияликлар Шон Пиннер ва Эйдан Аслин ҳамда марокашлик Брагим Саадуннинг тақдири кутяптими, деган саволига Песков: «Мен ҳеч нарсага кафолат бера олмайман, бу терговга боғлиқ», — деб жавоб берди.
17 июнь куни «Известия» ва RT нашрларининг Telegram-каналларида ўзларини АҚШ фуқаролари деб атаган икки кишининг видеоси эълон қилинган эди. Улар ўзларини Александр Дрюк ва Энди Хьюн деб таништирган.
«Улар ёлланма жангчилар ва Украина ҳудудида ноқонуний фаолиятга жалб қилинган. Улар бизнинг ҳарбийларимизни ўққа тутишда қатнашган, уларнинг ҳаётига хавф туғдирган ва ўзлари амалга оширган жиноятлар учун жазога тортилиши керак», — дея таъкидлади президент матбуот котиби.
Аввалроқ The Telegraph Дрюк ва Хьюн Украина армияси томонида туриб жанг қилгани ва Харьков яқинида қўлга олингани ҳақида хабар берганди. Уларнинг оилалари CNN’га маълум қилишича, америкаликлар билан қарийб бир ҳафта алоқа узилиб қолган. Телеканал маълумотларига кўра, эркаклар Избицкое қишлоғи яқинидаги жангда йўқолиб қолган, уларни қидириш ишлари натижа бермаган.
Айни вақтда АҚШ Давлат департаменти расмий вакили Нед Прайс идора сўнгги ҳафталар ичида учинчи америкалик ғойиб бўлгани ҳақида маълумотга эга эканини айтди.
27 февраль куни, Украинада Россия ҳарбий операцияси бошланганидан кейин бир неча кун ўтиб, президент Владимир Зеленский Киев жанговар ҳаракатларда қатнашиш учун чет эллик кўнгиллиларни жалб қилмоқчи эканини айтганди. Шунда у Украина ҳудудий мудофаасининг халқаро легион ташкил этилганини ҳам эълон қилганди.
Россия Мудофаа вазирлиги чет эллик кўнгиллиларни ёлланма жангчилар деб атайди ва уларнинг йўқ қилингани ҳақида бир неча марта ҳисобот берган.
9 июнь куни «Донецк халқ республикаси» Олий суди Украина томонида туриб жанг қилган британияликлар Шон Пиннер ва Эйден Эслинни ҳамда марокашлик Брагим Саадунни ўлим жазосига ҳукм қилганди.
Улар устидан суд жараёни 7 июнь куни бошланган, улар ДХР Жиноят кодексининг 34-моддаси («Бир гуруҳ шахслар томонидан жиноят содир этиш»), 323-моддаси («Ҳокимиятни мажбуран тортиб олиш ёки ҳокимиятни мажбуран ушлаб туриш») ва 430-моддаси («Ёлланиш») билан айбланмоқда. Маҳбуслар ўз айбларига қисман иқрор бўлган.
АҚШ Давлат департаменти раҳбари Энтони Блинкен уларга ўлим жазоси тайинланганидан хавотир билдирди. Британия расмийлари ҳам ушбу ҳукмни қоралади. Британия ташқи ишлар вазири Лиз Трасс ДХР судининг қарорини тўқима ва ҳеч қандай қонунга асосланмаган деб атади.
Изоҳ (0)