Ижтимоий тармоқларда Чорвоқ сув омбори юзасида чиқиндилар сузиб юргани акс этган видеолавҳа тарқалди. Ҳолат Тошкент вилояти Экология бошқармаси ходимлари томонидан ўрганилди.
Ўрганишлар натижасида сўнгги кунларда ёққан кучли ёмғир оқибатида Чорвоқ сув омбори ҳавзаси ва юза қисмига ҳар хил турдаги чиқиндилар йиғилиб қолгани аниқланган. Ҳозирда чиқиндилар махсус техника ва қайиқлар ёрдамида тегишли тартибда бартараф этилмоқда.
Фавқулодда вазиятлар вазирлиги маълумотларига кўра, сув устидаги чиқиндилар, асосан, дарахтлар, новдалар ва ўсимликларнинг қисмларидан иборат. Бу масса табиий равишда Чорвоқ сув омборига оқиб тушадиган Пском дарёси орқали тушган. Экологларнинг фикрига кўра, бу кенг тарқалган табиий ҳодиса ҳисобланади. Тегишли хизматлар сув омборини чиқиндидан тозалаган.
Изоҳ (0)