Шавкат Мирзиёев ва Озарбайжон президенти Илҳом Алиев 21 июнь куни икки мамлакат делегациялари иштирокида кенгайтирилган таркибда музокара ўтказди. Бу ҳақда Президент матбуот хизмати хабар қилди.
Қайд этилишича, Шавкат Мирзиёев ўзаро манфаатли ҳамкорлик юқори даражага чиққани, мамлакатлар ўртасидаги дўстлик ришталари ва ўзаро англашув мустаҳкамланиб бораётганини таъкидлаган. Ўзбекистон—Озарбайжон стратегик шериклигини кенгайтириш ва уни янги амалий мазмун билан бойитишга интилиш шартлиги қайд этилган.
Ўзбекистон президенти ҳамкорлик учун мавжуд салоҳиятни ишга солиш, икки мамлакат иқтисодиётини тўлдириб турувчи омиллардан фойдаланиш зарурлигини таъкидлаган. Хусусан, Мирзиёев ўзаро савдо ҳажмини ошириш, саноат кооперациясини кенгайтириш, машинасозлик, электротехника, тўқимачилик, виночилик, озиқ-овқат, қурилиш, нефть-газ, газ-кимё, фармацевтика, агросаноат ва бошқа тармоқларда қатор лойиҳаларни амалга оширишни таклиф этган. Мамлакатларда истиқболли кооперация лойиҳаларини ишлаб чиқиш ва илгари суриш мақсадида қўшма инвестиция фондини ташкил этишга келишиб олинган.
Шунингдек, маҳсулотларни учинчи мамлакатлар бозорига экспорт қилиш учун давлатлар ҳудудидаги эркин иқтисодий зоналарда қўшма лойиҳаларни амалга ошириш муҳим аҳамиятга эга экани таъкидланган. Транспорт коммуникациялари тизимидан, шу жумладан, Боку–Тбилиси—Қарс темир йўлидан фойдаланган ҳолда бу борадаги ишлар самарадорлигини ошириш чора-тадбирлари келишиб олинган. Икки томонлама савдо ва товарлар транзити йўлидаги тўсиқларни ўз вақтида бартараф этиш учун транспорт вазирлари раҳбарлигидаги махсус ишчи гуруҳ ташкил этилади.
Мутасадди вазирларга ипакчилик кластерини ташкил этиш, ғўзачиликдаги лойиҳаларни илгари суриш, инновацион ишланмаларни жорий қилиш бўйича «йўл харитаси»ни келишиб олиш топширилган.
Томонлар яқин фурсатда икки давлат пойтахтлари ва йирик шаҳарлари ўзаро ҳамкорлик муносабатларини йўлга қўйишига келишиб олган. Ўзбекистон раҳбари жорий йилда Тошкент шаҳрида биринчи Ҳудудлар форуми ва уларнинг саноат салоҳиятига бағишланган кўргазмани ўтказиш таклифини илгари сурган. Туризм соҳасидаги ҳамкорликни кенгайтириш ҳам ишбилармонлик ва гуманитар алоқаларнинг мустаҳкамланишига хизмат қилиши қайд этилган. Президентлар бу борада алоҳида дастур қабул қилиш ва қўшма туризм ярмаркасини ўтказиш ғоясини қўллаб-қувватлаган.
Музокаралар чоғида маданий-гуманитар алоқаларни мустаҳкамлаш, жумладан, Маданият ва кино кунларини ўтказиш, олий таълим даргоҳлари, илмий муассасалар, спорт ва ёшлар ташкилотлари ўртасидаги алоқаларни кучайтириш юзасидан қатор бошқа келишувларга ҳам эришилган.
Илҳом Алиев ташрифининг биринчи куни
Шавкат Мирзиёев таклифига биноан Озарбайжон президенти Илҳом Алиев 21 июнь куни давлат ташрифи билан Ўзбекистонга келди. Озарбайжон президентининг Ўзбекистонга ташрифи Ҳайдар Алиев шарафига номланган кўча ва унинг ёдгорлиги очилишидан бошланди. Шундан сўнг Озарбайжон президенти Шавкат Мирзиёев ҳамроҳлигида «Янги Ўзбекистон» боғига ташриф буюриб, Мустақиллик монументи пойига гул қўйди.Кейинроқ Кўксаройда Илҳом Алиевни расмий кутиб олиш маросими бўлиб ўтди. Маросимда Ўзбекистон ва Озарбайжон расмий делегациялари аъзолари иштирок этди. Аввал тор доирада, сўнг кенгайтирилган тартибда музокалар ўтказилди. Давлат раҳбарлари стратегик шерикликни чуқурлаштириш ва ҳар томонлама ҳамкорликни кенгайтириш тўғрисидаги декларацияни имзолади. Шундан сўнг ОАВ учун брифинг ўтказилди.
Ташриф Ўзбекистон ва Озарбайжон президентларининг Тошкентдаги Технопаркни бориб кўриши, Фахрий меҳмонлар хиёбонига кўчат экиши билан давом этди.
Изоҳ (0)