Жанубий Корея ва АҚШ келаси ой Вашингтонда мудофаа бўйича мунтазам музокараларни ўтказишга келишиб олди. Бу ҳақда ушбу масаладан хабардор одамларга таяниб, ОАВ хабар берди.
Манбаларга кўра, Корея—АҚШ интеграциялашган мудофаа мулоқотининг (КИДД) аниқ санаси ҳозирча белгиланмаган, бироқ тадбир тахминан июль ойи ўрталарида бўлиб ўтиши кутилмоқда.
Шимолий Кореянинг ядровий ва ракета таҳдидларини биргаликда тўхтатиш масаласи музокаралар кун тартибида биринчи ўринда туриши мумкин.
Қайд этилишича, томонлар май ойида президентлар Юн Сок Ёл ва Жо Байден ўртасида бўлиб ўтган саммитда эришилган келишувга мувофиқ, қўшма ҳарбий машғулотларни кенгайтириш ва АҚШ стратегик кучларини Кореяда «ўз вақтида ва мувофиқлаштирилган ҳолда» жойлаштиришни ҳам муҳокама қилиши мумкин.
Шунингдек, август ойида Жанубий Корея, Япония ва АҚШ қўшма ҳарбий машғулотлар ўтказиши хабар қилинганди. Бундай келишувга КХДРнинг янги ядро синовларига тайёргарликни якунлаётганидан хавотирлар ортиб бораётган бир шароитда эришилган. 2022 йил бошидан бери Пхеньян ўнлаб ракета синовларини ўтказди.
Изоҳ (0)