РСФСР собиқ давлат котиби Геннадий Бурбулис вафот этди. У Ельцин билан биргаликда Беловеж келишувини имзолаган

Борис Ельциннинг энг яқин сафдошларидан бири, собиқ давлат котиби ва Россия бош вазири ўринбосари Геннадий Бурбулис 19 июнь куни 76 ёшида вафот этди.

Бурбулис Москвада вафот этди, деди унинг матбуот котиби Андрей Марков «Интерфакс»га. Озарбайжон матбуоти унинг Бокуда вафот этганини даъво қилмоқда.

Марковнинг айтишича, Бурбулиснинг ўлими кутилмаган ҳодиса бўлган. «У касал эмасди, ўзини жуда яхши ҳис қилаётганди, яқиндагина ‘Глобал дунё тартибига таҳдид’ мавзуси муҳокама қилинган IX Глобал Боку форумида иштирок этганди», — деди Марков.

Геннадий Бурбулис 1991 йил июндан 1992 йил ноябргача мавжуд бўлган Россия Совет Федератив Социалистик Республикаси (кейинчалик — Россия Федерацияси) давлат котиби бўлиб ишлаган, шунингдек, Россия ҳукумати раҳбарининг биринчи ўринбосари бўлган.

Геннадий Бурбулис Россия томонидан Борис Ельцин билан биргаликда СССРни тарқатиб юбориш тўғрисидаги Беловеж келишувларини имзолашда иштирок этган.

2022 йил май ойида мустақил Беларуснинг биринчи раҳбари Станислав Шушкевич ва Украинанинг биринчи президенти Леонид Кравчук бир неча кунлик фарқ билан вафот этгани ҳақида хабарлар берилганди. Уларнинг иккиси ҳам Беловеж келишувини имзолашда иштирок этган.