Исроилда COVID-19 нинг янги тўлқини бошланаётгани маълум қилинди

Исроил коронавирус инфекциясининг янги тўлқини ёқасида, дея маълум қилди мамлакат Соғлиқни сақлаш вазирлиги бош директори Нахман Эш 103 FМ радиосида.

Эшнинг таъкидлашича, Соғлиқни сақлаш вазирлиги касалланишлар сонининг сезиларли ўсаётганини, шунингдек, касалликнинг оғир ҳолатлари ва касалхонага ётқизишлар сони ортаётганини аниқлаган.

«Фикримча, буни янги тўлқин деб аташ мумкин», — деди у ва касалланишнинг кўпайишига BА.5 коронавирусининг омикрон штамми субварианти сабаб бўлаётганини қўшимча қилди.

Шу билан бирга, Эшнинг таъкидлашича, Соғлиқни сақлаш вазирлиги бунинг ортидан янги чекловлар жорий қилмоқчи эмас, фақатгина ёпиқ жамоат жойларида ниқоб тақиш талабини қайта қўллаш имконияти кўриб чиқилмоқда.

«Ушбу вариант жуда юқумли бўлса ҳам ёпилиш ёки шунга ўхшаш чекловлар учун ўрин йўқ», — деди у.

Исроил Соғлиқни сақлаш вазирлиги маълумотларига кўра, 13 июнь куни мамлакатда апрель ойидан бери биринчи марта 7000 дан ортиқ янги COVID-19 ҳолати аниқланган. Май ойининг охиридан бошлаб касалланишлар сони ўсишни бошлаган. Ўтган сутка давомида мамлакатда 4,9 мингдан ортиқ кишида инфекция қайд этилган бўлиб, улардан 158 нафари оғир аҳволда, бу бир ҳафта аввалгига нисбатан 125 фоизга кўпдир.