Қозоғистон ҳукумати бошқа давлатларни, жумладан, ядровий мамлакатларни 2045 йилгача ядро қуролини тўлиқ йўқ қилиш бўйича босқичма-босқич режа ишлаб чиқишга чақирди. Бу ҳақда Қозоғистон ташқи ишлар вазири Мухтор Тлеуберди «Liter.kz» нашрига берган интервьюсида айтиб ўтди.
«Украина ҳудудидаги ҳозирги ҳарбий можаро, ядровий қуролнинг қайтарилиши ва ядровий қуролдан фойдаланиш бўйича ўзаро таҳдидлар ҳақида гапириш бизни ҳар қачонгидан ҳам кўпроқ инсониятнинг жамоавий заифлиги ҳамда ушбу ҳалокатли қуролларни тақиқлаш ва йўқ қилиш зарурати ҳақида ўйлашга мажбур қилади», — дея ёзади Қозоғистон ТИВ раҳбари.
Унинг қайд этишича, ядро қуролини тўлиқ йўқ қилиш бўйича келишувлар 21—23 июнь кунлари Вена шаҳрида бўлиб ўтадиган Ядро қуролини тақиқлаш тўғрисидаги шартноманинг биринчи конференцияси якуний ҳужжатларида ёзилиши мумкин.
Мухтор Тлеубердининг қўшимча қилишича, БМТ бош котиби Антониу Гутерриш аввалроқ дунё бўйлаб 13 400 га яқин ядро каллаклари мавжудлиги, бу ядро қуролини ишлатиш эҳтимолини «совуқ урушнинг энг қора кунларидагидан ҳам реалроқ» қилишини айтган.
Изоҳ (0)