Украина армияси уруш бошланганидан буён оғир қурол-яроғларининг 50 фоизини йўқотган

Украина жанговар ҳаракатларда оғир қурол-яроғларининг ярмини йўқотди. Бу ҳақда Украина Қуруқлик қўшинлари логистика қўмондони Владимир Карпенко National Defence журналига маълум қилди, деб ёзади «РБК».

«Бугунги кунгача бизда фаол жанглар натижасида 30—40, баъзан эса 50 фоизгача техника талафоти бор», — деди у. Унинг маълумотларига кўра, Украина 1300 та пиёдалар жанговар машинаси, 400 та танк ва 700 та артиллерия тизимини йўқотган.

Карпенконинг айтишича, фронт чизиғи 2,5 минг км масофага чўзилган. «Фаол жанглар бораётган фронт чизиғи 1000 километрдан ошади. Бу Киевдан Берлингача бўлган масофага тенг», — деди у.

Карпенконинг аниқлик киритишича, битта бригада тахминан 40 километр фронтни ушлаб туради. «Бу шуни билдирадики, фаол ҳарбий низолар бораётган майдонни ҳимоя қилиш учун бизга 40 та бригада керак. Ҳар битта бригада — бу 100 та пиёдалар жанговар машинаси, 30 та танк, 54 та артиллерия тизими дегани, бизда эса 40 та бригада бор», — дея хулоса қилди у.

Россия Мудофаа вазирлиги 17 июнь куни махсус операциялар бошидан буён Украинанинг 205 та самолёти, 131 та вертолёти, 342 та зенит-ракета мажмуаси, 3587 та танки ва бошқа жанговар зирҳли машиналари, 539 та баравар ўт очиш реактив тизими жанговар машинаси, 2013 та дала артиллерияси қуроллари ва миномётлари, 1233 та учувчисиз учар қурилмаси, шунингдек, 3658 та махсус жанговар автомобиль техникаси йўқ қилингани ҳақида хабар берганди.

Украина ҳукумати Ғарб мамлакатларига қурол-яроғ етказиб беришни сўраб бир неча марта мурожаат қилган. Апрель охирида Украина президенти Владимир Зеленский шериклар Киевга ўзи сўраган қурол-яроғларни етказиб беришни бошлаганини маълум қилган, аммо гап айнан қандай қуроллар ҳақида бораётганига аниқлик киритмаган эди.

Аввалроқ АҚШ Мудофаа вазирлиги Украинага 108 та М777 гаубицаларини етказиб берганини маълум қилди. Шунингдек, АҚШ президенти Жо Байден Киевга 1 миллиард долларлик янги ҳарбий ёрдам пакети берилишини эълон қилди, у ерга артиллерия қуроллари ва ракета тизимлари кирди. Украинага оғир қурол-яроғ етказиб беришни апрель охирида Германия ваъда қилганди, бироқ ҳозирча бирорта ҳам қурол юборгани йўқ.

Украина президенти офиси раҳбарининг маслаҳатчиси Михаил Подоляк Россияга тенг келиш учун 1 мингта 155 миллиметрлик гаубица, 300 та баравар ўт очиш реактив тизими, 500 та танк ва 2 мингта зирҳли техника кераклигини айтди.

Украинанинг Австралиядаги элчиси Василий Мирошниченко таъкидлашича, Зеленский дипломатларга иложи борича кўпроқ қурол-яроғ, шу жумладан, гаубица ва зирҳли техника етказиб берилишига эришиш вазифасини юклаган.