Буюк Британия бош вазири Борис Жонсон Украинага ташриф билан келди. Бу ҳақда Sky News ҳамда HuffPost УК нашрлари хабар берган.
Украина президенти Владимир Зеленский Британия ҳукумати раҳбари билан Киевдаги учрашув тафсилотлари акс этган видеолар ва фотосуратларни эълон қилган.
Украина президенти офиси раҳбари Андрей Ермак Зеленский ва Жонсон Украинага қурол-яроғ етказиб бериш ҳамда иқтисодий ёрдам кўрсатиш, шунингдек Россияга қарши санкцияларни кучайтириш масалаларини муҳокама қилганини билдирган.
Бу Россия Украинада уруш бошлаганидан кейин Жонсонннинг Киевга иккинчи ташрифи. Киевга биринчи сафарни у 9 апрелда ўтказганди. Жонсоннинг Украинага биринчи ташрифи ҳам иккинчиси ҳам олдиндан эълон қилинмаган.
16 июнда Киевга Италия бош вазири Марио Драги, Франция президенти Эммануэль Макрон ва Германия канцлери Олаф Шольц келганди. Улар Украинага Евроиттифоқ аъзолиги мақомини зудлик билан берилишии қўллаб-қувватлашлари ҳақида баёнот берган.
17 июнда Еврокомиссия ҳам Украинага номзодлик мақомини беришни тавсия қилган. Молдова ҳам шундай номзод мақомлигига тавсия олган. Еврокомиссия Грузияга ЕИ аъзолиги мақомини беришни рад этган.
Украина ҳамда Молдовага ЕИ аъзолигига номзодлик мақомини бериш ҳақидаги қарор Евроиттифоқнинг Брюсселда 23 – 24 июнда бўлиб ўтадиган саммитида муҳокама қилинади.
Изоҳ (0)