Давлат хавфсизлик хизмати Андижон вилоятининг Қўрғонтепа туманида Ўзбекистон ва Қирғизистон давлатларини боғлайдиган яширин ерости йўлларини аниқлади. Бу ҳақда ДХХ ахборот хизмати хабар қилди.
Қайд этилишича, ДХХнинг Андижон ва Наманган вилоятлари бўйича бошқармалари ходимлари томонидан 22 январь куни тезкор тадбир ўтказилган. Унда катта миқдордаги чет эл валюталарини ноқонуний равишда хорижга чиқариш билан шуғулланувчи трансчегаравий жиноий гуруҳ фаолиятига чек қўйилган. Уларнинг навбатдаги 1 миллион 641 минг 106 долларни Қирғизистонга ноқонуний чиқариш режасининг олди олинган.
Тезкор тадбир давомида Қўрғонтепа туманининг Қорасув шаҳридаги «З.М.Бобур» МФЙда яшовчи гуруҳ аъзосининг (1990 йилда туғилган) яшаш манзили кўздан кечирилган. Натижада унинг ҳовлисида эни 1 метр квадрат, чуқурлиги 12—12,5 метр ва узунлиги 150 метр бўлган, Қирғизистонга ноқонуний ўтиш учун махсус қазилган ерости йўли борлиги маълум бўлган.
Бундан ташқари, мазкур туманнинг «Бирлик» МФЙда жойлашган, гуруҳ аъзоларидан яна бирига тегишли хонадон ҳовлисида эса эни 1 метр квадрат, чуқурлиги 10—12 метр, узунлиги 400—420 метр атрофидаги иккинчи ерости йўли борлиги аниқланган. Ушбу ерости йўлига қўлбола пўлат изларда ҳаракатланувчи кичик ҳажмли, электродвигателли аравача ўрнатилган.
2 нафар Ўзбекистон ва 6 нафар Қирғизистон фуқароларидан иборат уюшган жиноий гуруҳга Қирғизистонда (1974 йилда) туғилган шахс етакчилик қилган.
Гуруҳ аъзолари ҳуқуқ-тартибот идоралари эътиборига тушмаслик мақсадида, ўзаро мулоқотда шартли сўзлашув усулини қўллашган. Улар Андижон вилоятидаги «Дўстлик» чегара-божхона постидан декларация тўлдирган ҳолда катта миқдордаги валюта қимматликларини мамлакат ҳудудига олиб кириб, сўнгра пулларни ерости йўли орқали Қирғизистонга қайтариб, олиб чиқиб кетган. Тўлдирилган декларациядан эса Тошкент ва Қўқон шаҳарларидан хорижий валюталарни ташишда йўлларда кузатиладиган эҳтимолий текширувларда фойдаланишган.
Ҳолат юзасидан гуруҳ аъзоларига нисбатан Жиноят кодексининг тегишли моддалари билан жиноят иши қўзғатилган. Олиб борилган тергов ҳаракатлари давомида уларнинг ноқонуний фаолиятлари ашёвий далиллар асосида ўз исботини топган.
25 май куни жиноят ишлари бўйича Норин туман судининг ҳукмига кўра, қонунбузарларга нисбатан 6 йилдан 8 йилгача озодликдан маҳрум этиш жазоси тайинланган.
Шунингдек, ДХХнинг Андижон вилояти бўйича бошқармаси ходимлари томонидан 5 февраль куни тезкор-қидирув тадбирлари ўтказилган. Натижада Қўрғонтепа туманининг Қорасув шаҳридаги «З.М.Бобур» МФЙда яшовчи бошқа бир фуқаронинг уйида ҳам қўшни давлат ҳудудига олиб ўтувчи яширин ерости йўли борлиги аниқланган.
У ҳам қирғизистонлик шахслар билан ўзаро тил бириктириб, ўзбек-қирғиз давлат чегарасини ажратиб турувчи Шаҳрихонсой канали остидан ўтувчи, чуқурлиги тахминан 16 метр, узунлиги 70 метр бўлган ерости йўли қазиб, уни махсус электр ёритгич тизими ва кислород билан таъминловчи ускуналар билан жиҳозлаган.
Ҳозирда мазкур фуқарога нисбатан қўзғатилган жиноят иши доирасида тергов ҳаракатлари олиб борилмоқда.
Ушбу учта ерости йўллари орқали катта миқдордаги чет эл валюталари Ўзбекистондан қўшни давлатга олиб чиқилиб, турли хил товар-моддий бойликлар мамлакатга олиб кирилган.
Қўзғатилган жиноят ишлари бўйича олиб борилган тергов ҳаракатлари доирасида жорий йилнинг апрель ойида Қирғизистон ҳуқуқ-тартибот идоралари номига, аниқланган учта ерости йўлларининг Қирғизистон томонида жойлашган манзиллари ва уларнинг ташкилотчилари тўғрисида тегишли маълумотлар юборилиб, уларга нисбатан қонуний чора кўриш сўралган.
Кейинчалик, жорий йилнинг май—июнь ойларида қўшни давлат вакиллари томонидан ўз ҳудудларида ўтказилган текширув ҳаракатлари натижасида, ушбу яширин ер ости йўллари фаолиятига чек қўйилган.
Эслатиб ўтамиз, май ойида ҳам Қорасув туманида Қирғизистон ва Ўзбекистонни ерости йўли орқали боғлаб турувчи туннел топилгани хабар қилинганди. Ушбу туннел аниқланган ҳудуд эгаси Жалолобод туманининг «Қизилжар» посёлкасидаги руҳий касалликлар шифохонасида даволанаётгани сабаб унга нисбатан қайта тиббий текширув ўтказиш режалаштирилган.
7 июнь куни ҳам Қирғизистон хавфсизлик кучлари томонидан Ўзбекистон билан чегарада 155 метрлик ерости туннели аниқланган. 13 июнь куни учинчи туннел ҳам топилган. У орқали Қирғизистондан Ўзбекистонга валюта ва товарлар олиб ўтиш режалаштирилган. Қирғизистон томонининг маълум қилишича, ҳозирда тергов давом этмоқда.
Изоҳ (0)