«Биз давлат бўлиб, ақлимизни, кучимизни ишга солиб, бу касалликларни енгишимиз керак» — Шавкат Мирзиёев

Шавкат Мирзиёев 17 июнь куни Болалар гематологияси, онкологияси ва клиник иммунологияси маркази фаолияти билан танишди. Бу ҳақда Президент матбуот хизмати хабар қилди.

Қайд этилишича, давлат раҳбари бу муассасанинг эски биносини ўтган йили 14 майда бориб кўрган. У пайтда шифохона Республика гематология маркази бўлиб, катталарга ҳам, болаларга ҳам бир жойда хизмат кўрсатилган. Дори таъминоти етарли бўлмагани, химия терапия усуллари йўлга қўйилмагани сабабли даволаниш самарадорлиги 30 фоиздан ошмаган.

Шу сабабли янги муассаса учун Тошкент шаҳри Чилонзор тумани Арнасой кўчасида қурилган янги бино берилган ва жорий йил январдан иш бошлаган.

Давлат раҳбари бу ердаги шароитлар билан яқиндан танишган. Янги марказда ўринлар сони олдинги 85 тадан 160 тага етказилган. Бемор бола ва унинг ота-онаси учун алоҳида шарт-шароитлар яратилган. Бугунги кунда 101 нафар бола даволанмоқда. 130 дан ортиқ шифокор, жумладан, 38 нафар илмий ходим ва юзлаб ҳамшира ишламоқда.

Болалар онкогематологияси, гематология, онкология, реанимация, гемодиализ ва плазмоферез бўлимлари, стационар ва маслаҳат поликлиникаси замонавий жиҳозланган. Бу йил аввалгиларига қўшимча 14 турдаги асбоб-ускуна келтириб ўрнатилган.

Дори воситалари билан таъминлаш даражаси ҳам оширилган. 2016 йилда бунинг учун 2 миллиард 800 миллион сўм маблағ ажратилган. Ҳозир бу миқдор қарийб 60 баравар оширилиб, 170 миллиард сўмга етган. 91 турдаги онкогематологик дори воситалари давлат ҳисобидан бепул берилмоқда.

Чет эллик консултантлар жалб этилиб, даволаш ва диагностика стандартлари янгиланган. Жумладан, ўзак хужайралари трансплантацияси сони ошган. Молекулар генетика, иммуногистохимия каби мураккаб ташхислар шу ернинг ўзида йўлга қўйилган. Илгари бунинг учун намуналар Ҳиндистон, Туркия, Россия каби давлатларга текшириш учун юборилган.

Бу ерда «Замин» фонди томонидан 40 ўринли мактаб ва 30 ўринли боғча ташкил этилган. «Меҳрли мактаб» ва «Илк қадам» номли ушбу муассасаларда болалар билим олади.

Президент марказда даволанаётган болалар ва уларнинг оналарига далда берган.

«Ёнингизга яна келишдан мақсадим — сизларга куч бериш, умидни икки карра кўпайтириш. Бу ҳаммамизга синов. Биз давлат бўлиб, ақлимизни, кучимизни ишга солиб, бу касалликларни енгишимиз керак. Ота-оналарга кўмак бериб, болаларнинг дардига малҳам бўлиб, уларни соғайтиришимиз зарур», — деган Шавкат Мирзиёев.

Шу ерда Болалар гематологияси, онкологияси ва клиник иммунологияси маркази фаолиятини кенгайтириш режалари тўғрисида маълумот берилган. Унга кўра, гемапоэтик ўзак ҳужайраларини аллоген ва аутологик трансплантация қилиш учун 2 та асептик бино, ҳудудлардан узоқ муддатга келадиганлар учун 200 ўринли хостел барпо этилади. Йил якунигача марказга яна 67 турдаги жиҳозлар келтирилади.

«Бу соҳа юртимизда янги тизим. Энди уни ҳудудий шифохоналардаги шундай бўлимлар билан боғлаб, касалликларни эрта аниқлаш зарур. Қуйи поғонада скринингни кенгайтириб, ‘касалликдан олдин юриш’ керак», — деган президент.

Ушбу марказ негизида илмни ривожлантириш муҳимлиги таъкидланган.

«Бинода шароит бор, муваффақият йўқ. Муваффақият илмда! Шунинг учун бу ер касаллик омилларидан тортиб, самарали даволаш услубларигача ўрганиш бўйича илмий марказ бўлиши керак. Вилоятлардаги тиббиёт ходимлари келиб, малака оширсин», — деган давлат раҳбари.

Бу соҳа ривожланган Германия тажрибаси асосида даволаш протоколини янгилаш, мутахассислар жалб этиш бўйича кўрсатмалар берилган.