Ижтимоий тармоқларда аёл ёш гўдагига шафқатсиз муносабатда бўлаётгани акс этган видео тарқалди. Воқеа Самарқанд вилояти Пайариқ тумани 1-сон Челак шифохонасида содир бўлган. «Дарё» мухбири ҳолатга аниқлик киритиш мақсадида журналистик суриштирув олиб борди.
Маълум бўлишича, бемор боланинг онаси 1988 йилда туғилган Малоҳат Нишонова Пайариқ туманинг «Бошқўрғон» маҳалласида яшайди. 2020 йилда туғилган фарзанди болалар серебрар фалажи касаллиги билан оғриган. 14 июнь куни Малоҳат Нишонова фарзандига муолажа олиш учун шифохонага олиб келган.
«Болани тан жароҳати олганлиги ёки уни урганлигини ўз кўзим билан кўрмадим. Палатасида бирга даволанаётган оналар кўриб, боласини урмаслигини тушунтирган. Улар бизга ҳам боласини уряпти, деб айтган эди. Биз кириб аёлга тушунтирдик, болани ургани билан яхши бўлмаслигини, вақти билан даволанса, яхши бўлиб кетиши ҳақида айтдик. Шу ҳолат қайтарилаверса, эртага оналикдан ҳам маҳрум қилинишинг мумкин, қолаверса, руҳий ҳолати ҳам яхши эмас, деган хулосага ҳам келиб қолиши мумкин деб тушунтириб айтдик», — дейди 1-сон Челак шифохонаси болалар бўлими бошлиғи Фахриддин Дўсматов.
Фахриддин Дўсматовнинг таъкидлашича, аёл ҳеч қандай руҳий касал эмас. Шифокорлар билан суҳбатда барча саволларга аниқ жавоб берган.
«Аёлнинг ҳуши ўзида. Неврологик ёки психологик касалликлари йўқ. У билан гаплашганимизда туғилганидан бери касалликдан боши чиқмаслиги, касал болага қарашдан чарчаб кетганлигини айтди. Аёл руҳий касалликлар шифохонасида рўйхатда турмаган», — дейди Фахриддин Дўсматов.
«Бошқўрғон» маҳалласи раиси Эркиной Худойбердиеванинг айтишича, Малоҳат Нишонова фарзандларига меҳрли. Оиласида ҳеч қачон жанжал бўлмаган. Бола 24 соат ухламагани учун ҳам она болага қарашдан чарчаб қолган.
«Малоҳат Нишонованинг яна икки нафар фарзанди бор: бир ўғил, бир қиз. Оиласи тинч. Болаларга меҳрли, яхши она. Фарзанди 2020 йил октябрь ойида туғилган. У ногирон. Ҳар доим иситмаси баланд бўлади. Шифохоналарда мунтазам равишда боласини даволатади.
Бола 24 соат ухламайди. Онанинг болага қараш шароити оғир. Она касал болага қараб жуда ҳам чарчаб кетган. Ҳозир нафақат болага, балки онасига ҳам ёрдам керак. Ҳаттоки овқат еса ҳам турмуш ўртоғи билан навбатлашиб, болага қараб овқатланиб олишади», — дейди Эркиной Худойбердиева.
Боланинг отаси Ғулом Нишоновнинг айтишича, фарзанди 7 ойлик туғилган. Турмуш ўртоғи нафақат ўзининг, балки бошқа болаларга ҳам ҳеч қачон қўпол муносабатда бўлмаган.
«Уйда ҳеч қачон бундай воқеа бўлмаган. Оилада яхшимиз. Ўз боласини ҳам, бошқанинг боласини ҳам бирор маротаба уришмаган. Ҳаммасини яхши кўради. Ҳали ҳолат юзасидан турмуш ўртоғим билан гаплашишга ҳам улгурмадим. Унинг ўзи ҳам билмай қолган. Видео ижтимоий тармоқларга чиқиб, уйга участкавойлар борганидан кейин билган. Қилган иши учун уришиб қўйишим мумкин, аммо унга жазо бермайман. Бола чарчатиб қўяди. Мени ўзим ҳам кеча эрталабгача қараб чиқдим. Ҳар куни шу аҳвол. Ҳар куни ё мен, ёки турмуш ўртоғим ухламайди. Туғилганидан буён аҳвол шу», — дейди Ғулом Нишонов
Самарқанд вилояти ИИБ матбуот котиби Жаҳонгир Сагдуллаевнинг маълум қилишича, ҳолат юзасидан Жиноят кодексининг 110-моддаси иккинчи қисми билан жиноят иши қўзғатилган.
«Бола айни пайтда Самарқанд вилоят болалар кўп тармоқли тиббиёт марказининг реанимация бўлимига ётқизилган. Бош шифокор Маматқул Азизовнинг айтишича, шифохона томонидан бола оталиққа олинган. Боланинг аҳволи оғир: бу касаллиги билан боғлиқ. Болада сепсис белгилари бор. Иситмаси баланд, озғин, оқсил етишмовчилиги бор. Ҳозир бола даволаниши учун реанимация бўлимига ётқизилган. Унда ҳеч қанақа жароҳат изи йўқ. Кўкариш ёки қаттиқ уриш белгилари кўринмайди. Бола шифохонага ётқизилганлиги учун фақатгина уколларнинг ўрни бор. Боладан тўлиқ таҳлиллар олинди. 2021 йилнинг сентябрь ойида ҳам бола бизда даволанган. Онасининг бундай хатти-ҳаракатини видеога кўрганимиздан сўнг суриштирув ишлари олиб бордик. Даволанган бўлимнинг барча ходимлари билан гаплашдик, онасида аввал бундай ҳаракат кузатилмаган», — дейди Маматқул Азизов.
Изоҳ (0)