Шавкат Мирзиёев 17 июнь куни янги Болалар гематологияси, онкологияси ва клиник иммунологияси марказини бориб кўрди. Бу ҳақда президент матбуот котиби хабар қилди.
Қайд этилишича, давлат раҳбари пойабзалига ҳимоя жилдлари ва эгнига оқ халат кийиб, марказдаги шароитлар билан танишувни бошлаган.
Марказ шифокорлари президентга соҳага қаратилаётган эътибор бераётган самаралар, яратилган шароитлардан таассуротлари ҳақида сўзлаб берган.
«Бунақа ўзгаришлар бўлишини ҳеч ҳам кутмагандик, туш кўраётгандекман. Ҳамма шароитлар бор, кенг, ёруғ. Ҳар бир беморимиз учун ўзининг шахсий палатаси, коровати, шахсий гигиеник воситалари бор. Жуда ҳам миннатдормиз», — дейди шифокорлардан бири.
Давлат раҳбари марказда даволанаётган болалар ва уларнинг ота-оналари билан суҳбатлашган.
Жумладан, бемор Саидазизхон билан мулоқотда бўлган Шавкат Мирзиёев унинг Президент мактабида ўқиш истагини инобатга олиб, имтиҳонларсиз ўқишга киритишини айтган: «Трансплантация ўтганидан кейин ўзим бу йигитни Президент мактабига имтиҳонсиз ўқишга киритаман».
Бундан ташқари, давлат раҳбари марказда ижод билан шуғулланиш учун яратилган шароитлар билан танишиб, болаларнинг машғулотларини кузатган.
Алан исмли бемор бола президентга орзусини айтиб берган: «Tesla заводининг бошлиғи бўлишни хоҳлайман». Шавкат Мирзиёев унга жавобан ҳозирда бола яшайдиган ҳудуд — Қорақалпоғистон ривожланаётганини, у катта бўлгунча Tesla ҳам кириб келишини айтган.
Давлат раҳбари шифохонани кўздан кечиргач, онкогематологик ёрдам соҳасида амалга оширилаётган ишлар ва эришилган натижалар, оналик ва болалик муҳофазасини янада такомиллаштириш ҳамда тиббиёт ходимлари билан ўтказилган мулоқотда берилган топшириқлар ижросининг бориши юзасидан йиғилиш ўтказади.
Изоҳ (0)