«Жонни — ҳамманинг севимли қаҳрамони, одамлар ҳам уни биламиз, деб ўйлайди». Эмбер Хёрд илк бор суд ҳақида сўзлаб берди

Суддан кейин Жонни Деппнинг мухлислари хурсанд бўлса-да, Эмбер Хёрдни қўллаб-қувватлаётган жамоа ҳайратда, деб ёзади The Symbol.

Хёрд ой бошидан бери биринчи марта сукунатни бузиб, NBC телеканалига интервью берди. Актриса аллақачон ҳукмга эътирози борлигини маълум қилган. У суд қароридан ҳафсаласи пир бўлганини ва «бу ҳукм бошқа аёллар учун нимани англатишини» ҳам айтиб ўтган.

Today шоуси бошловчиси билан эмоционал суҳбатда Хёрд судьяни айбламаслигини, чунки «унинг бошқа иложи йўқлигини» маълум қилган. Актриса аччиқ киноя билан: «Қандай қилиб улар бошқача қарор қилсин? У (Депп) ҳамманинг севимли қаҳрамони, одамлар ҳам уни биламиз, деб ўйлайди», — деди.

Актрисанинг сўзларига кўра, у жараён бошланиши билан пайдо бўлган ишончсизлик ва нафратни ҳанузгача ҳис қилмоқда: «Агар мен буларнинг барчасига лойиқ эканлигимга ва ёлғон гапираётганимга ишончингиз комил бўлса ҳам, суд адолатли ўтди ва оммавий ахборот воситалари уни холис ёритди, деб тасдиқлай олмайсиз», — дейди Эмбер Хёрд.

Эслатиб ўтамиз, суд Эмбер Хёрдни Жонни Деппга туҳмат қилганликда айбдор деб топди. Актриса бунинг учун собиқ турмуш ўртоғига 15 миллион доллар тўлаши керак.