Зални «жонлантирган» Севинч Мўминова, саломатлиги оғирлашган хонанда ва саҳнага чақирилмаган Муҳаббат Қурбонова — Воҳиджон Исоқовнинг илк концертидан репортаж (фото ва видео)

Бу йил илк яккахон концерт дастурини ўтказишга аҳд қилган хонандалар кўп бўлди. Улар орасида Воҳиджон Исоқов ҳам бор. У 14—15 июнь кунлари «Халқлар дўстлиги» санъат саройида «Ўзимнинг севгилим» номли дастурини тақдим этди. «Дарё» мухбирлари концертга ташриф буюриб, фото ва видеорепортаж тайёрлади.

Воҳиджон Исоқов 1988 йили санъаткорлар оиласида дунёга келган. У 2011 йилдан буён санъат майдонида ўз ўрнини топишга интиляпти. «Боролмадим», «Эслагин», «Салом, севгим» қўшиқлари билан халқ эътиборини тортган.

Илк яккахон концертида хонанда ҳаяжонланиши, камчилик ва хатоларга йўл қўйиши табиий ҳол. Воҳиджон Исоқовнинг концерти ҳам камчиликлардан холи ўтмади. Олайлик, кўпчилик томошабинларга концерт рэпертуари бироз тартибсиз жойлангандек туюлди. Қўшиқларни бир-бирига боғлайдиган уйғунлик бўлмагани учун дастурнинг биринчи блоки зерикарли ўтди.

Хонанда ҳам ҳаяжонда эканлигини кўп бор такрорлади. Бундай ҳолатда кейинги қўшиқ номини ҳам эсдан чиқариб қўйганини тўғри тушуниш мумкин.

Ўзбек концертларидаги анъанага мувофиқ хонанда концертига қизиқчи Зокир Очилдиевни таклиф этди. У 10 дақиқалик танаффус вақтида томошабинларни зериктирмаслиги керак эди.

Ёш қизиқчиларнинг белдан паст ҳазилларидан нолиймизу, аммо устоз даражасига етганлар ҳам шундай ҳазиллар қилишса, дардимизни кимга айтамиз?!

Концертда рақсбоп қўшиқлар жуда кўп бўлди. Айниқса, Воҳиджон Исоқовнинг Севинч Мўминова билан куйлаган дуэти саҳнага ўзгача кайфият олиб кирди.

Хонандани қўллаб-қувватлаш учун кўплаб санъат вакиллари ҳам ташриф буюришди. Маҳмуд Намозов, Даврон Эргашев, Аҳад Қаюм, Севинч Мўминова шулар жумласидандир.

Хонанда устоз санъаткор Равшан Намозовнинг қўшиғини куйлашдан аввал халқдан у кишининг ҳаққига дуо қилишларини, у айни кунларда оғир хасталик билан курашаётганини айтиб ўтди.

Онасининг вафотидан сўнг саҳнадан бироз йироқлашган опа-сингил Муҳаббат ва Малика Қурбоновалар бу хонанданинг концертида кўриниши беришди. Фақат бу сафар раққоса сифатида эмас, балки янги ташкил этилган «Муҳаббат» ансамблининг раҳбари ва хореографи сифатида иштирок этишди. Малика Қурбонова шогирдларига ўрнак бўлиш учун саҳнада ўзбекона рақслардан бирини ижро этди.

Дастурни қизиқчи Маъмур Холмедов ва актриса Шаҳзода Муҳаммедовалар олиб боришди. Шаҳзодани қўллаб-қувватлаш учун турмуш ўртоғи Марат Хайруллаевич ҳам концертга ташриф буюрди.

Бундан ташқари, концерт давомида мухлислар билан совринли ўйинлар танлови ҳам ўтказилди.

Концерт ҳам бир имтиҳондек гап. Воҳиджон Исоқов бу синовдан ўтишга жиддий тайёргарлик кўрганини пайқаш қийин эмас. Фақат у кўпроқ эътиборини ранг-баранг костюмларию ва мухлисларни жалб қилиш усулларига қаратган кўринади. Албатта, бу қайсидир томошабинларга ёқар. Аммо концерт саройига борган томошабин кўпроқ жонли ижрода қўшиқ тинглашни истайди, хонанда келгуси дастурларида бунга алоҳида эътибор бериши керак.

Мавзуга доир:

• Мусиқий билимга эга бўлмаган, клиплари ҳеч қачон телеканалларда кўрсатилмаган юлдуз. Жалолиддин Аҳмадалиевнинг илк яккахон концертидан репортаж (фото, видео)
• «Қизил олма»дан «Санамгина»гача: Юлдуз Усмонованинг «80—90 йил хитлари» концерт дастуридан репортаж (фото ва видео)
• Аҳад Қаюмнинг ўхшамаган пиари, саҳнани эгаллаган вайнчилар. Ҳамдам Собировнинг илк яккахон концертидан репортаж (видео)
• «Беном» — Сарвар ва Комил янги дастурдаги камчиликлар, Заҳида билан дуэт, «ўхшамаган» концертлари ҳақида (видео)
• Саҳнани қўриқлаётган Ҳалима ва Мансур Агалиевнинг кўз ёшлари. Юлдуз Усмонованинг концертидан репортаж (видео)
• Жасур Умировдан Фаррух Зокировгача. «Сен азиз ва муқаддассан, аёл» гала концертидан репортаж (видео)